Ձեր վստահելի աղբյուրը

Պաշտոնական այցով Հայաստանում գտնվող Իտալիայի արտաքին գործերի և միջազգային համագործակցության նախարար Պաոլո Ջենտիլոնին ՀՀ արտգործնախարար Էդվարդ Նալբանդյանի հետ հանդիպման ժամանակ ստորագրել են Հայաստանում մշակութային ժառանգության պահպանման և վերականգնման տարածաշրջանային կենտրոն հիմնելու մասին համատեղ հայտարարությունը:

«Մենք կարևորում ենք այս համատեղ հայտարարությունը: Շնորհակալ ենք Իտալիայի կառավարությանը՝ վերոհիշյալ ոլորտում ցուցաբերվող նշանակալի աջակցության համար: Համոզված ենք, որ կենտրոնի հիմնումը էլ ավելի կխորացնի համագործակցությունը մշակույթի և կրթության ոլորտում»,- հանդիպումից հետո համատեղ ասուլիսում ասաց Էդվարդ Նալբանդյանը:

Պաոլո Ջենտիլոնին նշեց, որ իրեն շատ հաճելի է, որ հանդիպումը սկսել են մի համաձայնագրի ստորագրմամբ, որը կյանք կտա Հայաստանում մշակութային ժառանգության պահպանման և վերականգնման տարածաշրջանային կենտրոնի ստեղծմանը:

«Սա շատ կարևոր է մեզ համար, մեր երկրների համար, մեր քաղաքակրթությունների համար՝ պահպանելու մեր մշակութային բազմազանությունը: Մի արժեք, որը և Իտալիան, և Հայաստանը, կարծում եմ, գնահատում են»,- ասաց Իտալիայի արտաքին գործերի և միջազգային համագործակցության նախարարը: