Ձեր վստահելի աղբյուրը

«Շենգավիթ» բժշկական կենտրոնի մանկաբարձության գծով փոխտնօրեն, մանկաբարձական բաժանմունքի ղեկավար Աշոտ Սիրունյանը ծննդկան Մերի Մարգարյանի առողջական վիճակի վերաբերյալ կոնսիլիումի ժամանակ առաջարկել է կեսարյան հատում անել, սակայն մանկաբարձ-գինեկոլոգը, նյարդաբանը, անեսթեզեոլոգիայի և ինտենսիվ թերապիայի բաժանմունքի վարիչը դեմ են եղել կեսարյան հատմանը: Այդ մասին այսօր Շենգավիթ վարչական շրջանի ընդհանուր իրավասության դատարանում տված ցուցմունքում հայտարարեց գործով վկա «Աստղիկ» բժշկական կենտրոնի վիրաբույժ Հայկ Հարությունյանը:

32-ամյա Հայկը Մերի Մարգարյանի հարազատն է, և նրա հետ տեղի ունեցած դեպքի օրերին աշխատել է «Շենգավիթ» բժշկական կենտրոնում, սակայն Մերիի հետ կատարվածից հետո հեռացել է այդ հիվանդանոցից ու աշխատանքի անցել այլ բուժկենտրոնում:

Ասաց՝ հուլիսի 27-ին առավոտյան «Շենգավիթ» ԲԿ-ում տեսել է Մերիին անվասալյակի վրա, փոխանցեց՝ իրեն թույլ էր զգում, բայց ժպտում էր, շնչառությունը հաճախացած էր, հարցերին դժվար էր պատասխանում: 

Հարությունյանի խոսքով, հետազոտության արդյունքներով Մերիի մոտ լյարդային անբավարարության նշաններ են ի հայտ եկել, գիտակցության խանգարում է նկատվել և նեղ կոնսիլիումի ժամանակ որոշվել է հրավիրել նեղմասնագետների՝ լյարդաբան ու նյարդաբան, որոնք «Շենգավիթ» ԲԿ-ն չունի:

«Մերին դեղորայքներ էր ստանում րեանիմացիայում, զգացողությունը միևնույն է, շարունակում էր մնալ վատ, անորոշ խոսքեր էր ասում, զառանցում էր, երբ հարցնում էինք՝ ինչ ես ասում, փոխում էր թեման: Նյարդաբանի հարցերին որոշակի ճիշտ էր պատասխանում, որոշակի սխալ: Հրավիրված նյարդաբանը կասկածեց, որ հնարավոր է նրա մոտ գլխուղեղի արյունազեղում կա և դրա համար խորհուրդ տրվեց նրան տեղափոխել բազմապրոֆիլ բժշկական կենտրոն՝ հետագա բուժումը շարունակելու համար», -ներկայացրեց Հայկ Հարությունյանը:

Մինչև կկազմակերպվեր Մերիի տեղափոխումը «Էրեբունի» բժշկական կենտրոն, վկայի ցուցմունքով, քննարկման հրավիրվել է նաև մանկաբարձության բաժանմունքի ղեկավար Աշոտ Սիրունյանը:

«Նրան զեկուցվեց, որ այս-այս հիվանդն է, այս տվյալներն ունի: Սիրունյանի կողմից հարց առաջ քաշվեց՝ միգուցե կեսարյան հատում անե՞նք, որին և բուժող բժիշկը, և անեսթեզեոլոգը, և նյարդաբանը կասկածելով արյունազեղում, չունենալով տեխնիկա, սարքավորումներ, գտան, որ հիվանդին պետք է տեղափոխեն բազմաֆունկցիոնալ բուժկենտրոն», -պատմեց Հայկ Հարությունյանը:

Նրա ներկայացմամբ, Մերիին շտապօգնության ծառայության օգնությամբ տեղափոխել են բուժկենտրոն և անգամ չեն սպասել, որ հրավիրված լյարդաբանի ժամանմանը, քանի որ անհրաժեշտ է եղել տեղափոխումն արագ կազմակերպել:

Մեղադրող դատախազը փորձեց հստակեցնել, թե ովքեր են դեմ եղել կեսարյան հատմանը, Հարությունյանը պատասխանեց, որ կեսարյան հատմանը կողմ կարծիք հայտնել է Սիրունյանը, իսկ նյարդաբան Խաչատրյանը, մանկաբարձ-գինեկոլոգ Շուշանիկ Բախշյանը և անեսթեզեոլոգ Ամրոյանը դեմ եղել կեսարյան հատման միջոցով Մերիին ծննդալուծելուն:

Տուժողի իրավահաջորդի ներկայացուցիչ, փաստաբան Մարինե Թովմասյանի հարցերին ի պատասխան Հայկ Հարությունյանը ասաց, որ Մերի Մարգարյանի մոտ մարմնի ջերմաստիճանի տատանումներ են եղել՝ մեկ եղել է 35,5, մեկ բարձրացել՝ 38 և ավելի:

Դա, ըստ վիրաբույժի, նշանակում է, որ օրգանիզմում բորբոքային պրոցեսներ կան: Ինչ վերաբերում է խոսքի խանգարմանը, ապա ըստ վկայի, լյարդի անբավարարությունը կարող է հանգեցնել ուղեղի ախտահարման: Ի դեպ, վկան նաև ասաց, որ լյարդի բուժման ուղղությամբ որևէ դեղորայքային բուժում չի իրականացվել:

Փաստաբան Թովմասյանը Հարությունյանից հետաքրքրվեց՝ այս պայմաններում որպես մասնագետ, արգելվա՞ծ էր Մերիին կեսարյան հատում անելը: Ի պատասխան վկան ասաց, թե կեսարյան հատում անելու ցուցում տալիս է նրան բուժող բժիշկը, որը Մերիի պարագայում ամբաստանյալ Շուշանիկ Բախշյանն է, իսկ նա դեմ է եղել կեսարյան հատմանը:

Տուժողի իրավահաջորդի ներկայացուցիչը հարցրեց, թե ինչո՞ւ ինչո՞վ էին բացատրում իրենց դեմ լինելը, Հարությունյանը պատասխանեց, որ չի կարող հարցերին պատասխանել, քանի որ տեղյակ չէ:

Կեսարյան հատման թեման շարունակեց նաև Շուշանիկ Բախշյանի փաստաբան Կարեն Կիրակոսյանը և հետաքրքրվեց, թե Մերի Մարգարյանին այդ վիճակում ինքը՝ Հարությունյանը, որպես հարազատ ու որպես մասնագետ, կեսարյան հատման կենթարկե՞ր:

«Ես այդ հարցին կպատասխանեմ որպես վիրաբույժ, որպես բժիշկ՝ եթե կեսարյան հատումը կատարվեր շուտ, բնականաբար, հիվանդությունից նրա օրգանները պաշտպանելը կլիներ ավելի հեշտ», -պատասխանեց Հայկ Հարությունյանը:

Փաստաբան Թովմասյանը հետաքրքրվեց նաև Մերիի նկատմամբ Բախշյանի վերաբերմունքից, և Հայկ Հարությունյանն ասաց, որ Բախշյանը կոպիտ է խոսել Մերիի հետ, «մուննաթով» արձագանքել նրան:

«Ասում էր՝  դու լավ ես, դու լավ ես, հիստերիկա մի արա: Կարծում եմ, որ հիվանդի ու հարազատների հետ պետք է լինել հոգատար: Բայց մարդ են, հոգնած են, հազարավոր մարդկանց հետ են շփվում», -նկատեց Հայկ Հարությունյանը:

Մյուս հարցին, թե ի վերջո, ո՞րն է եղել վերջնական ախտորոշումը Մերիի հիվանդության, Հայկ Հարությունյանն ասաց, որ փորձագիտական եզրակացությամբ Մերիի մոտ եղել է «ՀԵԼԼՓ» (HELLP) հիվանդություն, որին ինքը ծանոթ չի եղել:

««ՀԵԼԼՓ» հիվանդության մասին իմացել եմ հեռախոսով, իմ ընկեր րեանիմատոլոգներից մեկից, նա ասաց՝ կարո՞ղ է «ՀԵԼՓ» է: Դրա մասին ես նույնիսկ բժշկուհուն հարցրեցի, և բժշկուհին ինձ ասաց, որ չէ, դա «ՀԵԼԼՓ»-ի նման չէ: Դրա մի ցուցանիշներից մեկը լյարդային ֆերմենտների բարձրացումն է հղի ժամանակ և այդ հիվանդությունը հատուկ է հղիներին: Բժիշկները կարող են ամբողջ կյանքն աշխատել, բայց նման հիվանդություն չտեսնեն: Ես որքանով տեղյակ եմ՝ Հայաստանում մեկ-երկու նման դեպք է եղել», -նշեց Հարությունյանը:

Ծննդկան Մերի Մարգարյանի և նրա երեխայի մահվան գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերիին ոչ պատշաճ բուժօգնություն ցուցաբերելու համար (ՀՀ Քրեական օրենսգրքի 130 հոդված)։