Ձեր վստահելի աղբյուրը

ԱՄՆ Թաֆթսի համալսարանի Ֆլեթչերի իրավունքի և դիվանագիտության դպրոցի գիտաշխատող, քաղաքագետ Սուրեն Սարգսյանը համարում է, որ ԱՄՆ նախագահի թեկնածու Հիլարի Քլինթոնի ընտրվելու շանսերն ավելի մեծ են, եթե իհարկե նրա բոլոր կողմնակիցները մասնակցեն քվեարկությանը:

«Ընտրությունների մասնակիցներրի թվով պայմանավորված դրա ընթացքը կարող է  որոշակի շեղումներ ունենալ, բայց մեծ հաշվով ես կանխատեսում եմ ՔԼինթոնի հաղթանակը»,-Մեդիա Կենտրոնում  «Թրա՞մփ, թե՞ Քլինթոն. ի՞նչ կփոխվի ընտրություններից հետո ԱՄՆ-ում և աշխարհում» թեմայով քննարկման ժամանակ ասաց Ս. Սարգսյանը:

Քաղաքագիտության դոկտոր Հայկ Մարտիրոսյանի կարծիքով, շատերը Քլինթոնին կողմ են քվեարկելու, որպեսզի Թրամփը չընտրվի:

«Այնպես չէ, որ ԱՄՆ հասարակությունը հիացած է Քլինթոնի քարոզարշավով կամ անձով»,-ասաց նա, ընդգծելով, որ քաղաքականության մեջ բավականին տխուր երևույթ է, երբ քվեարկում են ընդդեմ, ոչ թե կողմ:

Քաղաքագետ, ԱԺ նախկին պատգամավոր Վարդան Խաչատրյանը կանխատեսումն անելն անշնորհակալ գործ է համարում, նշում է, որ հարցախույզներն էլ ճիշտ չեն արտացոլում իրականությունը:

Անդրադառնալով փոփոխությունների վերաբերյալ հարցին, Խաչատրյանն ասաց, որ դրան արդեն եղել են:

«Տեկտոնիկ անցումներն արդեն տեղի են ունեցել, դրանց դրսևորումներին մենք ականատես ենք: Օրինակ, ոչ սիստեմային մարդը, ինչպիսին է Թրամփն ի վիճակի  հասնել մինչև ֆինալ, ու այստեղ էլ պարզ չէ, թե ով կհաղթի»,-ասաց նա: