Ձեր վստահելի աղբյուրը

«Հայ ազգային Սոցիալ Դեմոկրատ Հնչակյան և Ռամկավար Ազատական կուսակցությունները՝ որպես պատասխանատու համահայկական քաղաքական կազմակերպություններ, միասնական ծրագիր, մոտեցում, պահանջներ պետք է ունենան սիրիահայերի խնդիրների լուծման առումով»,- «Սիրիահայության առջև ծառացած ներքին և արտաքին մարտահրավերները» խորագրով քննարկմանն ասաց ՍԴՀԿ ատենապետ Նարեկ Գալստյանը:

Ռամկավար Ազատական կուսակցության ատենապետ Հակոբ Ավետիքյանը նշեց, որ պատահական չէ, որ երկու ավանդական կուսակցությունները նման նախաձեռնությամբ են հանդես գալիս:

«Վաղուց պետք է արվեր, քանի որ այսօր օրակարգի խնդիր է»,- ասաց նա:

Նրանք նշեցին, որ անհանգստությամբ են հետևում Սիրիայում և հատկապես Հալեպում տեղի ունեցող ողբերգական իրադարձություններին, որոնք անմիջապես հարվածում են տեղի հայ գաղութի ֆիզիկական անվտանգությանը, ոչնչացման:  Կուսակցությունների ատենապետերն ասացին, որ թեև կարևոր է Սիրիայում հայ համայնքի շարունակականության խնդիրը՝ իբրև Միջին Արևելքում աշխարհաքաղաքական գործոն, սակայն միևնույն ժամանակ չեն կարող հանգիստ հետևել, թե ահաբեկչական գործողությունների հետևանքով ինչպես են զոհվում սիրիահայերը:

Կուսակցությունները հանդես եկան համատեղ հայտարարությամբ. «Հալեպի շուրջ ստեղծված աննախադեպ իրավիճակը պահանջում է ոչ միայն քաղաքական կուսակցությունների, այլև ողջ հայության համախմբում, ինչն էլ պետք է հանգեցնի հստակ քայլերի՝ սիրիահայության փրկության հարցում: Պետք է իրականացնել  մեր այն հայրենակիցների շտապ տարհանումը, ովքեր չեն ցանկանում մնալ Սիրիայում, սակայն նաև հնարավորություն չունեն դուրս գալ այնտեղից: Հայաստանի կառավարությունը պետք է մշակի և իրականացնի գործնական քայլեր՝ Հայաստան ներգաղթել ցանկացող սիրիահայերի ապրուստի և աշխատանքի ապահովման հարցում, որպեսզի վերջիններս  չմտածեն այլ երկրներ արտագաղթելու մասին»: