Ձեր վստահելի աղբյուրը

ԱՆ «Երևան-Կենտրոն» քրեակատարողական հիմնարկում լրագրողներին այսօր տհաճ անակնկալ էր սպասում. ծրագրված էր, որ 10 լրագրող պետք է հանդիպում ունենային վնասազերծված զինված խմբի գործով կալանքի տակ գտնվող պաշտպանության նախկին փոխնախարար Վահան Շիրխանյանի հետ, սակայն հանդիպումը չկայացավ:

ՔԿՀ հերթապահ կապիտանը չընդունեց լրագրողների դիմումները, որտեղ նշված չէր ՔԿՀ պետի կոչումը և առաջարկեց գրել մեկ այլ դիմում, որտեղ կգրվի ՔԿՀ պետ Վ. Պապոյանի կոչումը և Շիրխանյանի հետ տեսակցելու թույլտվություն խնդրող լրագրողների քանակը: Լրագրողներն այդպես էլ արեցին՝ նշելով, որ 10 լրագրողներ ցանկանում են հանդիպել Վահան Շիրխանյանի հետ:

Մեկ ժամ սպասեցնելուց հետո ԱՆ «Երևան-Կենտրոն» ՔԿՀ պետը մերժեց լրագրողներին՝ վկայակոչելով կառավարության համապատասխան որոշումը, որի համաձայն «կալանավորված անձի հետ միաժամանակ տեսակցել թույլատրվում է առավելագույնը երեք չափահաս անձ»:

Այնուհետև լրագրողները վարվեցին այնպես, ինչպես պահանջում էր վերոնշյալ կարգը. երկրորդ անգամ դիմում գրեցին՝ խնդրելով երեք լրագրողի հանդիպել Շիրխանյանի հետ:

Սակայն այս դեպքում էլ դարձյալ մեկ ժամ սպասեցնելուց հետո ԱՆ ՔԿՀ պետը մերժեց՝ այս անգամ պատճառաբանելով քրեակատարողական հիմնարկի ծանրաբեռնվածությունը:

Վահան Շիրխանյանի փաստաբան Հայկ Ալումյանը, որը լրագրողների հետ միասին սպասում էր հնարավոր հանդիպմանը, ճեպազրույցում հայտարարեց, որ ինքը ԱՆ «Երևան-Կենտրոն» ՔԿՀ վարչակազմին միջնորդել էր՝ խնդրելով օր ու ժամ սահմանել, որպեսզի լրագրողները հանդիպեն պարոն Շիրխանյանին: Սակայն, նրա խոսքով, ԱՆ քրեակատարողական հիմնարկի վարչակազմը դա թողել է Շիրխանյանի հայեցողությանը՝ չառարկելով լրագրողների հետ նրա հանդիպմանը:

«Մերժման որոշումը աճպարարություն է: Այսպիսի լուրջ հիմնարկին սազական պատասխան չէ: Սրա միակ նպատակն այն է, որ խոչճընդոտներ ստեղծվեն լրագրողների հետ Շիրխանյանի հանդիպմանը», -հայտարարեց Ալումյանը:

Նրա ներկայացմամբ, Վահան Շիրխանյանը զինված խմբի գործի վերաբերյալ ցանկանում էր մի քանի մանրամասներ հայտնել՝ իր դիրքորոշման հետ կապված:

«Նա նաև ցանկանում էր որոշ հանգամանքներ ասել, թե ինչու է իր նկատմամբ ապօրինի հետապնդում իրականացվում ում կողմից է հրահրված և ինչու», -ներկայացրեց փաստաբանը:
Ալումյանը նաև ասաց, որ Շիրխանյանի առողջական վիճակը շատ ծանր է, դժվարությամբ է իր խցից հասնում տեսակցության սենյակ:

Նշենք, որ զինված խմբի վերաբերյալ քրեական գործն ուղարկվել է դատարան, սակայն առայժմ հայտնի չէ, թե որ դատավորի վարույթում է քրեական գործը և չի նշանակվել դատաքննության օրը: