Ձեր վստահելի աղբյուրը

Ֆուտբոլի աշխարհի 2018 թ. առաջնության ընտրական փուլի Հայաստանի ազգային հավաքականի հետ վաղը կայանալիք հանդիպումից առաջ նախախաղային մամուլի ասուլիսում հանդես եկան Չեռնոգորիայի ընտրանու գլխավոր մարզիչ Լյուբիշա Տումբակովիչը և թիմի հարձակվող Ստեֆան Յովետիչը:

Թիմի առաջատար Յովետիչը նշեց, որ ընտրական փուլի մրցաշարն իրենք բավական լավ են սկսել և վաղը պատրաստ են շարունակել հաջողությունը:

«Չեռնոգորիայի հավաքականում հիանալի մթնոլորտ է տիրում: Չենք կարծում, որ վաղը մեզ հեշտ հանդիպում է սպասվելու: Գիտենք, որ Հայաստանի հավաքականն ունի նոր գլխավոր մարզիչ, լավ ֆուտբոլիստներ և, ըստ իս, վաղը բավական բարդ դիմակայություն է սպասվում: Չեռնոգորիայի հավաքականում հիանալի է մթնոլորտ է տիրում և մենք պատրաստ ենք զարգացնել հաջողությունը»,- ասավ Յովետիչը:

Հյուրերի գլխավոր մարզիչ Տումբակովիչը նշեց, որ իր թիմի համար խաղերից յուրաքանչյուրը
յուրահատուկ նշանակություն ունի:

«Բոլոր խաղերը մեզ համար կարևոր են: Սա մինի-լիգա է` բաղկացած 10 խաղերից և դրանցից յուրաքանչյուրն ունի արժեք` 3 միավորի տեսքով: Այս խաղի կարևորությունն այնքան է, որքան մեկնարկային խաղինը և որքան հետագա դիմակայություններինը: Հայաստանի հավաքականը նախորդ խաղերին այնքան էլ լավ արդյունքներ չի գրանցել, սակայն կարող եմ ասել, որ դրանցից մի քանիսում պարզապես Ձեր բախտը պարզապես չի բերել»,- ասաց Տումբակովիչը` նկատի ունենալով Ռումինիայի և Լեհաստանի հավաքականի հետ մրցավեճերը:

Հենց այդ պատճառով էլ Չեռնոգորիայի հավաքականի գլխավոր մարզիչը հստակ պատկերացումներ չտվեց Հայաստանի հավաքականի մասին, սակայն փաստեց, որ ունենք հիանալի ֆուտբոլիստներ, որոնք կարող են վճռել խաղի ելքը:

«Մենք ուսումնասիրել ենք Հայաստանի հավաքականի խաղը, ներուժը շատ մեծ է, քան այն արդյունքները, որոնք գրանցել եք: Բացի այն ֆուտբոլիստներից, որոնք լավ են խաղում, դուք ունեք խաղացողներ, որոնք թոփ մակարդակի են»,- ասաց Տումբակովիչը:

Մարզիչն ավելացրեց, որ ակնկալում է արդար խաղ, որում կփորձեն ցանկալի արդյունքի հասնել: Տումբակովիչն ավելացրեց, որ պարտավոր չեն լավ արդյունք գրանցել, սակայն պարտավոր են լավ խաղ ցուցադրել: