Ձեր վստահելի աղբյուրը

ՀՀ վարչապետ Կարեն Կարապետյանը Կենտրոնական բանկի նախագահ Արթուր Ջավադյանին կառավարության այսօրվա նիստում առաջարկեց առևտրային բանկերի հետ քննարկել օրինապահ հարկատուների հետ արտոնյալ պայմաններով աշխատելու հարցը:

Վարչապետը նշեց, որ նախաձեռնությունը ՀՀ պետական եկամուտների կոմիտեինն է:

«Պարոն Ջավադյան, ՊԵԿ-ի ղեկավարն առաջարկություն ունի, որը կայանում է հետևյալում. իրենք ուզում են հարկատուների դասակարգում մտցնել և տալ օրինապահ հարկատու կարգավիճակ: Խնդրում են Ձեզ, որպեսզի Ձեր միջոցով առևտրային  բանկերի ղեկավարների հետ քննարկել հետևյալ հարցը. եթե հարկատուն ունի նման կոչում, որակավորում, իրեն բանկերը վերաբերվեն արտոնյալ պայմաններով: Ո՞նց եք կարծում՝ դա իրագործելի՞ է»,- դիմելով Արթուր Ջավադյանին՝  նշեց Կարեն Կարաետյանը:

Ի պատասխան՝ ԿԲ նախագահն ասաց, որ թափանցիկ կազմակերպություններին խթանելու համար իրենք կարող են որոշակի փոփոխություններ անել կանոնակարգերում և ռիսկային կշիռները բանկերի համար նվազեցնել: «Մենք դա արդեն իսկ կիրառել ենք արտահանող կազմակերպությունների համար, այդ դեպքում բանկերն ավելի լայն հնարավորություն են ունենում և վարկերի հասանելիությունը միանգամայն խորանում է, բանկերը հնարավորություն են ունենում ավելի մատչելի պայմաններով և հեշտ ու ավելի արագ վարկեր տրամադրել»,- ընդգծեց Արթուր Ջավադյանը՝  միաժամանակ հավելելով, որ մի փոքր աշխատանքը բանկերի հետ՝ թափանցիկ կազմակերպություններին միանշանակ կխթանի:

«Ես էլ եմ վստահ, քանի որ եթե ինքը հասկանալի, կանխատեսելի գործընկեր է, ապա բանկերի ռիսկերը նվազում են: Խնդրում եմ քննարկել և լուծումներ տալ»,- ընդգծեց  վարչապետը: