Ձեր վստահելի աղբյուրը

ՀՀ կառավարությունն այսօրվա նիստում հավանություն տվեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին», «Զինծառայողների և նրանց ընտանիքի անդամների սոցիալական ապահովության մասին» «Պետական կենսաթոշակների մասին» ՀՀ օրենքներում լրացումներ ու փոփոխություններ կատարելու մասին փաթեթին:

ՀՀ պաշտպանության նախարար Վիգեն Սարգսյանը նշեց, որ առաջարկվում է հատուցում վճարել այն զինծառայողների ընտանիքներին, որոնք մահացել կամ հաշմանդամություն են ստացել մարտական գործողություններին մասնակցելու, շփման գծում մարտական հերթապահության կամ հատուկ առաջադրանք կատարելու ժամանակ:

Վիգեն Սարգսյանի խոսքերով՝  2016 թվականի ապրիլ ամսվա դեպքերը ցույց տվեցին, որ ծավալուն մարտական գործողություններ սկսվելու պարագայում  զինծառայողների կյանքին կամ առողջությանը պատճառված վնասները միայն պետական բյուջեի միջոցների հաշվին ամբողջ ծավալով հատուցելը խնդրահարույց է, ուստի  դրա համար անհրաժեշտ են ֆինանսավորման լրացուցիչ աղբյուրներ:

«Այդ նպատակով նախատեսում է ներդնել հատուցման հատուկ համակարգ, որը կներառի պետական և հասարակական աջակցության տարրեր: Իրավաբանական անձի կարգավիճակ ունեցող հատուկ հիմնադրամը կմիավորի ստացվող դրամական միջոցները, իսկ առաջացած միջոցների հաշվին կփոխհատուցվեն զինծառայողների կյանքին կամ առողջությանը պատճառված վնասները: Զինծառայողների մահվան դեպքում հատուցման գումարները կվճարվեն նրանց ընտանիքների անդամներին՝ ծնող, ամուսին, զավակ, զինծառայողի խնամքի տակ գտնվող մինչև 23 տարեկան քույր, եղբայր»,- ընդգծեց  նախարարը:

Վիգեն Սարգսյանը հայտնեց, որ համակարգը կներդրվի 2017 թվականի հունվարի 28-ից հետո առաջացող դեպքերի համար:

Նախագծի հիմնավորման համաձայն՝ ապրիլյան դեպքերից տուժած զինծառայողներին աջակցելու նպատակով հավաքագրվել են զգալի ծավալով դրամական միջոցներ՝ ՀՀ և Սփյուռքի հասարակության տարբեր շերտերից ստացված դրամաշնորհների և նվիրաբերությունների հաշվին:

«Սա ցույց է տալիս մեր հասարակության պատրաստակամությունը՝ աջակցելու հայրենիքը պաշտպանող զինծառայողներին և իրենց ընտանիքի անդամներին, և որ պահանջվող լրացուցիչ ֆինանսավորումը հնարավոր է հավաքագրել՝ հասարակության լայն շերտերից»,- նշված է հիմնավորման մեջ:

Հատուցման չափերը հետևյալն են.

Մահվան կամ առաջին կարգի հաշմանդամության դեպքում սպաներին միանվագ նախատեսվում է վճարել 10 մլն դրամ, 20 տարվա ընթացքում ամսական հատուցում՝ 300 հազար դրամի չափով, ենթասպաների համար՝ 10 մլն դրամ միանվագ վճար և 20 տարվա ընթացքում ամսական 205 հազար դրամ, շարքայինների համար՝ 10 մլն դրամ միանվագ վճար, ամսական 200 հազար դրամ՝ 20 տարվա ընթացքում:

Երկրորդ կարգի հաշմանդամության դեպքում յուրաքաչյուր խմբի միանվագ կճարվի 5 մլն դրամ, բացի այդ 20 տարվա ընթացքում ամսական վճարներ կսահմանվեն՝ սպաների համար 200 հազար, ենթասպաների համար 150 հազար և շարքայինների համար 100 հազար դրամ:

Բոլոր այս դեպքերում, եթե զինծառայողն ունի երեք կամ ավելի երեխա, ապա ի հավելումն այս գումարների, ամսական կվճարվի ևս 100 հազար դրամ:

Հատուցման գումարների վճարումն իրականացնելու և հավաքագրված դրամական միջոցները կառավարելու նպատակով առաջարկվում է ստեղծել հատուկ կառույց` զինծառայողների կյանքին կամ առողջությանը պատճառված վնասների հատուցման հիմնադրամ:

Հիմնադրամի կողմից հատուցումներ վճարելու համար անհրաժեշտ դրամական միջոցները կձևավորվեն հետևյալ աղբյուրներից`

- Յուրաքանչյուր աշխատող ֆիզիկական անձի կողմից ամսական 1000 դրամ գումարի չափով վճարվող դրոշմանիշային վճարներից.

- Պետական կառավարման կամ տեղական ինքնակառավարման մարմինների կողմից մատուցվող ծառայություններից օգտվող անձանց կողմից վճարվող վճարներից` յուրաքանչյուր ծառայության համար` համապատասխանաբար` 500 և 200 դրամ գումարի չափով.

- Հատուկ այդ նպատակով թողարկված արժեթղթերի վաճառքից.

- Հատուկ այդ նպատակով ստացված դրամաշնորհներից, նվիրաբերություններից և նվիրատվություններից.

- Վերը նշված աղբյուրներից հավաքագրված միջոցների կառավարման (ներդրման) արդյունքում ստացվող եկամուտներից:

Հիմնադրամը կունենա կառավարման համակարգ` ՀՀ կառավարության և ՀՀ կենտրոնական բանկի ներկայացուցիչներից բաղկացած հոգաբարձուների խորհուրդ, գործադիր տնօրեն, գործադիր հանձնաժողով, որի միակ գործառույթն է լինելու հիմնադրամի միջոցների պրոֆեսիոնալ կառավարման ապահովումը, եթե այդ միջոցները կառավարվելու են Հիմնադրամի կողմից ինքնուրույն:

Հիմնադրամի միջոցների կառավարումը կարող է հանձնվել կառավարման Հիմնադրամի հոգաբարձուների խորհրդի կողմից ընտրված մասնագիտացված կառավարչին: