Ձեր վստահելի աղբյուրը

«Խաղի աշխարհի առաջնությունը Հայաստանում անցկացնելով փորձ է արվում ինտելեկտուալ զբաղմունքը համադրել զբոսաշրջային և մշակութային հետաքրքրության հետ։ Պատահապան չէ, որ մենք այն Ծաղկաձորում ենք անցկացնում»,- «Ի՞նչ, որտե՞ղ, ե՞րբ» խաղի աշխարհի 14-րդ առաջնության բացման արարողությունից հետո լրագրողների հետ զրույցում ասաց  «Ի՞նչ, որտե՞ղ, ե՞րբ» խաղի կազմկոմիտեի հայաստանյան նախագահ Արմեն Աշոտյանը:

«Այս խաղի զանգվածայնությունը շատ մեծ է, այն տարածված է բազմաթիվ երկրներում։ Մասնակից թիմերի անդամների մեծամասնությունը բլոգերներ են, որը ստեղծում է Հայաստանի մասին դրական տեղեկատվական բովանդակություն։ Եթե այս քանի օրը սոցկայքերին հետևեք, կտեսնեք, թե ինչքան շատ ու դրական են Հայաստանի մասին գրառումները», - նշեց Աշոտյանը:

Նրա խոսքով՝ իրենց գլխավոր նպատական է, որ թիմերը դրական տպավորություններով հեռանան Հայաստանից. «Շատ մասնակիցներ եկել են ընտանիքներով,  խաղից շուտ և էքսկուրսիաներ կատարել, անգամ կան մարդիկ, որ Արցախ են գնացել»:

Ինչ վերաբերում է բուն խաղին, Աշատոյանն ասաց, որ խաղի այս ձևաչափը տարբերվում է հեռուսատեսությամբ ցուցադրվող ձևաչափից. «Այստեղ մենք տեսնում ենք աստղերի, որոնք ոչ միայն լավ խաղում են, այլև ապահովում են շոու»:

Լրագրողները հետաքրքրվեցին, թե որպես ֆավորիտ ու՞մ է տեսնում, խաղի կազմկոմիտեի հայաստանյան նախագահը պատասխանեց. «Միշտ չեն ֆավորիտ հանդիսացող թիմերը լինում առաջատարներ։ Ավանդաբար ուժեղ են Ռուսաստանի, Ուկրաինայի, Բելառուսի և Իսրայելի թիմերը»:

Աշոտյանը հավելեց, որ ամենադժվարը խաղիկ կապիտանի գործն է, քանի որ պետք է լսի բոլոր այն մարդկանց, ովքեր իրենց  համարում են խելացի ու հավակնոտ ու պնդում են իրենց ասածը. «Քաղաքականության մեջ սա պետք է գալիս, որովհետև բոլորը պնդում են իրենց ասածը, իսկ ղեկավարը կարճ ժամանակում պիտի ընտրի լավագույն լուծումը և տա պատասխաններ բարդ հարցերին» :

Խաղին մասնակցող 56 թիմից 20 կանցնեն եզրափակիչ, ովքեր էլ կխաղարկեն հաղթողի կոչումը։
«Ի՞նչ, որտե՞ղ, ե՞րբ» խաղի աշխարհի 14-րդ առաջնության կազմկոմիտեի համակարգող, «Գիտակների հայկական ասոցիացիայի» նախագահ Տիգրան Քոչարյանը նշեց, որ պահանջները խիշտ են՝ առաջնությունն անցկացնող երկրի ընտրության հետ կապված. «Երբ, հասկացանք, որ կարող են պատշաճ և բարձր մակարդակով անցկացնել առաջնությունը, դիմեցինք միջազգային ասոցիացիային: Հիմա ամեն ինչ ընթանում է այնպես, ինչպես որ մենք էինք նախատեսել»: