Ձեր վստահելի աղբյուրը

Հայաստանը շատ արդյունավետ համագործակցում է Հյուսիս-ատլանտյան դաշինքի հետ 1990-ականներից: Դաշինքը Հայաստանի  համար վստահելի գործընկեր է եղել,- Հայաստանում «ՆԱՏՕ-ի շաբաթ»-ն ազդարարող ասուլիսի ժամանակ ասաց ՀՀ ՊՆ պաշտպանական քաղաքականության վարչության պետի տեղակալ Մհեր Իսրայելյանը:

Նա  տեղեկացրեց, որ Հայաստանը տարբեր ուղղություններով է համագործակցում ՆԱՏՕ-ի հետ, առանձնացրեց երեք հիմնական ուղղություն:  Մ. Իսրայելյանի խոսքով՝ ռազմական  համագործակցության շրջանակում Հայաստանը մասնակցում է խաղաղարար գործողություններին Կոսովոյում և Աֆղանստանում:

«Ռազմական համագործակցության շրջանակներում մենք մասնակցում ենք ՆԱՏՕ-ի զորավարժություններին, վարժանքներին, դասընթացներին, իրականացնում ենք օպերատիվ կարողությունների հայեցակարգի գնահատում, այսինքն ստուգում ենք մեր մարտական պատրաստականության մակարդակը, ՆԱՏՕ-ի ուժերի հետ համագործակցելու պատրաստակամությունը»,- ասաց նա:

Որպես համագործակցության երկրորդ ուղղությունը ՊՆ ներկայացուցիչը նշեց  պաշտպանական բարեփոխումները. «ՆԱՏՕ-ն մեր պաշտպանական քաղաքականության շրջանակներում կարևոր գործընկեր և խորհրդատու է՝ ծրագրերն իրականացնելու հարցերում»:

Երրորդ ուղղությունը վերաբերում է պաշտպանական կրթությունը. ՆԱՏՕ-ի փորձագիտական խումբը  տարեկան մի քանի անգամ այցելում է Հայաստան, խորհրդատվության է տրամադրում պաշտպանական կրթության ծրագրերն արդիականացնելու, ավելի ժամանակակից  պաշտպանական կրթության համակարգ կառուցելու համար:

Մ. Իսրայելյանը տեղեկացրեց, որ «Վստահության հիմնադրամ» ծրագրի շրջանակներում առաջիկայում պատրաստվում են իրականացնել զրահապատ մեքենաների ոչնչացում, որոնք գործածությունից պետք է դուրս գան:

«Գերմանիան  համաձայնել է ստանձնել  այս ծրագրի առաջատարությունը և մի քանի օր առաջ Բրյուսելում հանդիպման ժամանակ հայտարարվեց, որ Գերմանիան ծրագրի իրականացման համար 1 միլիոն եվրո է տրամադրելու»,- ասաց նա:

«Վստահության հիմնադրամ»  ծրագրի բաղացուցիչ մասն է նաև, ՀՀ ՊՆ պաշտպանական քաղաքականության վարչության պետի տեղակալի խոսքով, ականների վերաբերյալ կրթական որոշակի ծրագրերի իրականացնումը: