Ձեր վստահելի աղբյուրը

«Եթե Դուք՝ որպես ԱԺ պատգամավոր, առաջարկեք մտցնել նվազագույն աշխատավարձ յուրաքանչյուր ժամկետային զինծառայողի համար, ես պատրաստ եմ Ձեզ հետ երկար ճանապարհ անցնել՝ այդ փողը և որոնելու, և վճարելու առումով»:

Այսպես արձագանքեց պաշտպանության նախարար Վիգեն Սարգսյանը պատգամավոր Հրանտ Բագրատյանի հարցին, թե ինչու պետությունը պարտադիր զինծառայություն անցնողներին աշխատավարձ չի վճարում:

Նախարարը խոստովանեց, միայն երջանիկ կլինի, եթե զինծառայողն իմանա, որ ինքը կամ իր ընտանիքը ծառայության ընթացքում ստանում են նվազագույն 55 հազար դրամը, որը թույլ կտա որոշ խնդիրներ լուծել:

«Եթե դուք դա անեք, պարոն Բագրատյան, ես կարծում եմ, մեծ ոգևորությամբ համահղիանակ կլինեմ: Մնում է միայն աղբյուրը գտնենք, բյուջեում կամ որևէ այլ տեղ»,-ասաց նախարարը:

Ինչ վերաբերում է պատգամավորի հարցին, թե ինչո՞ւ  զինծառայողների կյանքին կամ առողջությանը պատճառված վնասների հատուցմամբ չի զբաղվում աշխատանքի և սոցիալական հարցերի նախարարությունը, պաշտպանության նախարարը նշեց, որ խոսքը ոչ թե սոցիալական նպաստի, այլ ապահովագրական  վճարի մասին է:

«Նպաստը ենթադրում է սոցիալական բաղադրիչ, իսկ այս վճարը, այնուամենայնիվ ենթադրում է  այլ մոտեցում: Մենք ոչ թե վճարում ենք որևէ մեկին, որովհետև նա մահացել է, այլ մենք վճարում ենք այն զինծառայողին, որը գնացել է առաջնագիծ, մարտական խնդիր կատարելիս զոհվել է թշնամու գնդակից կամ այդ պայմաններում իրենից չկախված հանագամանքներում: Այս քաղաքականությունը միտված է ասելու, որ այն զինծառայողը կամ կամավորը, ով գնացել է ,  չմտածելով անգամ իր կյանքի մասին,մարտի դաշտում կարողացել է իր ծառայությունը բերել հայրենիքին, հայրենիքը պատրաստ է  կանգնել նրա կողքին»,-մանրամասնեց Վ. Սարգսյանը:

Նախարարը նշեց՝  այո, խոսքը ապահովագրության մասին է, ռիսկն այն է, որ ռազամական գործողություններ կան:

Դիվանագետ, միջազգայնագետ Սարգսյանը խոստովանեց, որ տնտեսագետ պատգամավորի կողմից  հարկերի ու պարտադիր վճարների՝ օրենքով սահմանված տարբերություններին չի տիրապետում, ասաց՝ անպայման կկարդա:

«Բայց պարտադիր վճարը տարբերվում է հարկից, քանի որ այն ուղղված է կոնկրետ խնդրի լուծմանը, այլ ոչ թե ընդհանուր բյուջեի ձևավորվմանը»,-ասաց նա:

Հարցին, թե  ինչու են գնացել հիմնադրամի ստեղծման ճանապարհով, նախարարը պատասխանեցց. «Բյուջեի մասին օրենքով մենք ունենք շատ հստակ սահմանափակում: Օրինակ,  կուտակված միջոցները մենք չենք կարող տեղափոխել մյուս տարի: Տարվա վերջին մենք դրանք վերադարձնում ենք պետբյուջե, հաջոդ տարվա բյուջեում նորից՝ զրյոից գրում ենք: Հաշվի առնելով, որ նման դեպքերը կարող են կուակային էֆեկտ ունենալ 20 տարվա մեջ, շատ դժվար է լինելու հաշվել 20-րդ տարում այդ տողի մեծությունը: Իսկ այս ձևով մենք կարող ենք միջոցները կուտակել, կառավարել»:

Նախարարի խոսքին արձագանքեց Բագրատյանը: Ասաց, առաջարկում է ոչ թե նվազագույն, այլ միջին աշախատավարձ ժամկետային զինծառայողներին: Միջոցներ գտնելու համար էլ հիշեց.

«44 միլիոն ֆինանսների նախարարությունը ծախսել է, կենտրոն է սարքել, ձեզ վատ եք զգում: Բա Կենտրոնական բանկի 150 միլիո՞նը, հազար ավելի մեքենա՞ն»:

Վ. Սարգսյանը հույս հայտնեց, որ Բագրատյանի նշած թվերի հետևում հաշվարկներ կան, ու այդ միջոցներով զինծառայողների միջին աշխատավարձի, զինծառայողներ պահելու խնդիր է լուծվում:

«Եթե դուք նման հաշվարկներ ներկայացնեք, ես իրոք, պատրաստ եմ այդ հաշվարկի վրա աշխատել»,-ասաց նախարարը, հիշեցնելով, որ այսօր միջին աշխատավարձ են վճարում պայմանագրային շարքային զինծառայողներին, որը բավականին լուրջ վճարում է: