Ձեր վստահելի աղբյուրը

2017 թվականի պետական բյուջեն նախագծելիս հաշվի է առնվել ընդհանուր տնտեսական իրավիճակը: Այս մասին Ծաղկաձորում պետական պարտքի թեմայով հրավիրած սեմինար-քննարկման ժամանակ ասաց ՀՀ ֆինանսների նախարար Վարդան Արամյանը՝ պատասխանելով հարցին, թե արդյոք բյուջեի նախագծում ռիսկերը գնահատվել են:

Նշենք, որ 2017 թվականի համար կառավարությունը նպատակադրել է ՀՆԱ-ի շուրջ 3.2 տոկոս աճի մակարդակ: 

Վարդան Արամյանի խոսքերով՝ կանխատեսման ռիսկերը պայմանավորված են  ինչպես արտաքին, այնպես էլ ներքին տնտեսական գործոններով, որոնք կարող են հանգեցնել ինչպես տնտեսական աճի տեմպերի ավելացմանը, այնպես էլ` նվազմանը:

«Բյուջեի սցենարի հիմքում ընկած է թե գլոբալ, թե Ռուսաստանի տնտեսական աճը, որը կանխատեսվում է շուրջ 1%-ի շրջանակներում, ինչպես նաև՝ հումքային ապրանքների միջազգային գների համեստ աճը: Եթե այս սցենարի շրջանակներում, բացասական ուղղությամբ որևէ շեղում լինի, բնականաբար, դա ազդեցություն է ունենալու մեր ՀՆԱ-ի աճի վրա»,- ասաց նախարարը:

Ֆինանսների նախարարը նշեց, որ ըստ մասնագետների՝ պատժամիջոցներից հետո Ռուսաստանի տնտեսությունը հասել էր հատակին, և 2016-ը կայունացման տարի էր, դրանից հետո թևակոխելու է վերելքի տարի:

«Բայց եթե այնպես լինի, որ նավթի միջազգային գները շատ ավելի ցածր լինեն, քան կանխատեսվում է, դա նշանակում է, որ մենք կունենանք դրանից ածանցված բացասական հետևանքներ մեր տնտեսության վրա. այսինքն՝  շատ ավելի կդժվարանա 3.2 տոկոս տնտեսական աճի ապահովումը»,- ասաց նա: 

Այսպիսով, ըստ Վարդան Արամյանի, եթե գլոբալ տենդենցներն այնպես չընթանան, ինչպես 2017 թ-ի ՀՀ պետական բյուջեի նախագծում է, կամ այնպես, ինչպես կանխատեսում են միջազգային կառույցները՝ Արժույթի միջազգային հիմնադրամը, Համաշխարհային բանկը և, եթե գլոբալ տնտեսությունում  ի հայտ գան նոր ցնցումներ՝ կապված աշխարհաքաղաքական զարգացումներով, ինչի արդյունքում գլոբալ տնտեսական աճը շատ ավելի թույլ կլինի, ապա դրանք անուղղակի ճանապարհներով Հայաստանի վրա կազդեն:

Ինչ վերաբերում է ներքին ռիսկերին, ապա, ըստ Վարդան Արամյանի, այստեղ շատ կարևոր է ներքին տնտեսվարողների և հանրության վարքագիծը: «Այն գործողությունները, որոնք դրված են մեր կառավարության ծրագրում, ազդակ են, որպեսզի դրական սպասումների հիմքի վրա տնտեսվարողները ներդրումային ծրագրերի նախագծեր մշակեն: Եթե ինչ-ինչ պատճառներով, ռեսուրսների չբավարարման հետևանքով, կամ որոշակի օբյեկտիվ պատճառներով որոշ բաներ չկարողանանք իրականացնել, և դա ազդի  մեր ներքին տնտեսվարողների վարքագծի վրա, ապա ավելի կդժվարանա 3.2 տնտեսական աճ ապահովելը»,- ընդգծեց Վարդան Արամյանը: