Ձեր վստահելի աղբյուրը

Ազգային ժողովում զինծառայողների կյանքին կամ առողջությանը պատճառված վնասների հատուցման մասին օրենքի նախագծի քննարկման ժամանակ  պատգամավոր Խաչատուր Քոքոբելյանը, դիմելով  Պաշտպանության նախարար Վիգեն Սարգսյանին՝ ասաց, որ թեև այդ կարծիքը չի կիսում, բայց հասարակության մեջ մտահոգություններ կան, թե այս նախագծի ընդունման հապճեպությունն արդյոք  նշանակո՞ւմ է, որ պատերազմ է սպասվում և իշխանությունն այլ ռեսուրսներ չունի:

Նա նաև հարցրեց, թե որքանո՞վ է արդարացի այն մոտեցումը, որ ինքն ու նախարարը վճարեն այնքան, որքան իրենց օգնականները կամ  70 հազար դրամ աշխատավարձ ստացողը:

Վիգեն Սարգսյանը նշեց, որ այս նախագիծը պատերազմի հետ կապ չունի. «Մենք չենք բերում այս քաղաքականությունը, որ մտածենք, թե վաղը պատերազմ է սկսելու: Բերում  ենք այս օրենքի նախագիծը, քանի որ յուրաքանչյուր օր մեր զավակները, կրտսեր եղբայրները մարտական ծառայություն են իրականացնում, և հակառակորդը խախտելով հրադադարի պայմանները, պարբերաբար իրավիճակ է ստեղծում, երբ ունենք վիրավորներ ու զոհվածներ:

Քաղաքականությունը և այս նախագիծը հիմնված է այդ իրողության, այլ ոչ թե սպասելիքի վրա»,- ասաց նախարարը:

Ինչ վերաբերում է այն հարցին, որ ինքն ու օգնականը միևնույն չափով են գումար փոխանցելու,Վիգեն Սարգսյանը պատասխանեց. «Չեմ համարում, որ ես ու իմ օգնականը, հավասար վճարելով, արդարության որևէ սկզբունք ենք խախտում, քանի որ ես իմ օգնականից շատ ավելի մեծ հարկեր եմ վճարում առհասարակ, իսկ սա ընդամենը մեկ պարտադիր վճար է, որը կարող է լինել հավասար և սոցիալական արդարության վրա որևէ ձևով չի ազդում, հատկապես, որ ինչպես և Դուք, նաև իմ շատ գործընկերներ, ես ևս պլանավորում եմ շատ ավելին վճարել հիմանդրամին, որովհետև հավատում եմ դրան ու կարծում եմ, որ դա շատ կարևոր է»: