Ձեր վստահելի աղբյուրը

Հայաստանի ֆուտբոլի ազգային հավաքականի ավագ Հենրիխ Մխիթարյանը պատմել է այն մասին, թե «Մանչեսթեր Յունայթեդ» տեղափոխության հարցում ո՞ր գործոններն են վճռորոշ դեր խաղացել` անգլիական ֆուտբո՞լը, թի՞մը, մարզի՞չը, թե ՞վարձատրությունը: Այս մասին տեղեկացնում է ՀՖՖ պաշտոնական կայքը:

«Երեք հաջող մրցաշրջան անցկացրեցի Գերմանիայում, բայց հնարավորություն ունեցա տեղափոխվել աշխարհի ուժեղագույն առաջնության բարձրակարգ թիմերից մեկը։ Հայրս միշտ սովորեցնում էր ինձ ինքս իմ համար մարտահրավերներ սահմանել, և որպեսզի կարողանայի շարունակել առաջխաղացումը, որոշեցի տեղափոխվել «Մանչեսթեր Յունայթեդ», որտեղ կարող եմ աճել՝ որպես ֆուտբոլիստ և անհատականություն։ Աշխատավարձը ոչ մի դեր չէր խաղում, տեղափոխվեցի ակումբի պատմության, առաջնության, երկրպագուների և մարզչի համար, ով աշխարհում լավագույններից մեկն է»,- նշել է Մխիթարյանը։

Միակ բանն Անգլիայում, որ չի գոհացնում հայ ֆուտբոլիստին, խաղաժամանակն է, սակայն Մխիթարյանը վստահ է, որ եթե շարունակի աշխատել, ապա կլրացնի այդ բացը:

«Հիասթափություններ չկան, միայն մարտահրավերներ են․ ես երբեք կանգ չեմ առնում կամ հիասթափվում, երբ արգելքների եմ հանդիպում իմ ճանապարհին։ Պարզապես շարունակում եմ պայքարել՝ իմ նպատակին հասնելու համար։ Այսօր բավականաչափ խաղաժամանակ չեմ ստանում՝ ուրեմն պետք է ամեն ինչ անեմ, որպեսզի մարզչական կազմն ինձ ավելի շատ խաղալու հնարավորություն ընձեռի։ Ես վստահ եմ, որ կարող եմ հաջողություն ունենալ «Մանչեսթեր Յունայթեդում», և ուզում եմ բոլորին ապացուցել, որ արժանի եմ այս թիմում և այս առաջնությունում լինել առանցքային խաղացող»,- ասել է նա։

Մխիթարյանը նաև նշել է, որ Պրեմիեր-Լիգան աշխարհի լավագույն առաջնությունն է, որն իրեն տալիս է շատ տարբեր զգացողություններ և նոր մարտահրավերներ։ Նա կարծում է, որ անգլիական փորձն իրեն ավելի ուժեղ կդարձնի: