Ձեր վստահելի աղբյուրը

Պատգամավոր Կարեն Բեքարյանը համոզված է՝ հասարակության մոտ չկա բանակին օգնելու կամ չօգնելու հարցադրում:

«Ես կարծում եմ՝ այդ հարցն ուղղակի չկա, այն միանգամից ունի դրական պատասխան»,-ասաց Հանրապետական խմբակցության ներկայացուցիչը:

Նրա խոսքով, եթե հանրային քննարկումների ժամանակ հանդիպում են «աննոմալ» երևույթներ, ապա գործ ունեն հարակից բլոկների հետ: Նա առաջարկեց, քննարկումների ավարտին պաշտպանության նախարարն ամփոփիչ խոսքում դրանց էլ անդրադառնա:

Այսօր օրենսդիր մարմնի ներկայացուցիչը նախագիծը  ներկայացնող գործադիր մարմնի ներկայացուցչին խնդրեց ներկայացնել նրա ունեցած դիրքորոշումը այդ հարցի քննարկումներում բաժանարար գծերի առաջացման անթույլատրելիության, ինչպես նաև անդրադառանալ ազգ-բանակ կոնցեպտին:

Վիգեն Սարգսյանը հայտարարեց, որ պաշտպանության նախարարը ՀՀ նախագահից հետո երկրորդ է, որ պե տք է անընդհատ պայքարի բաժանարար գծերի՝ գործընթացների վրա չազդելու կամ նվազագույն չափով ազդելու առումով:
«Շատ հասկանալի պատճառով բաժանարար գծերը երկրի պաշտպանության գործին որևէ կերպ օգտակար լինել չեն կարող»,-ասաց նախարարը:

Սարգսյանի կարծիքով, այս կամ այն հարցին անհամաձայն լինելով հանդերձ, երբ խոսվում է բանակի, պաշտպանության, հաշմանդամ դարձած կամ զոհված զինծառայողի մասին, պետք է եռակի-քառակի նրբանկատություն, զգոնություն ցուցաբերել:

«Այս օրերին ես հանդիպեցի բազմաթիվ ձևակերպումների, որոնք ուղղակի պատիվ չեն բերում: Ես բացարձակ դեմ չեմ, որ կպնում են իմ անձին, դեմ չեմ, որ պաշտպանության նախարարի դիմանկարը պետք է պատկերել 1000 դրամանոց թղթադրամի վրա, դա ամեն մեկի ճաշակի հարցն է, բայց երբ որ դա անում է մարդը, ով դասալիք է՝ դա առնվազն ինձ մոտ ծիծաղ է արժանացնում, մնացածն արդեն իր ընտրության հարցն է»,-ասաց նախարարը:

Սարգսյանին զարմացրել է «Մահ իմացեալ, մահ՝ վճարեալ» վերնագրով հրապարակումը, զարմացել է,  որ քննարկումները տեղափոխվում են դաշտ, որն կապ չունեն օրենքի նախագծի հետ:

«Ես հասկանում եմ՝  վստահության խնդիր է, վստահության խնդիր է պետության նկատմամբ, որն առաջին հերթին վերագրում եմ մեզ: Բայց ուզում եմ միանալ նրանց, ովքեր առաջին օրերին գրեցին. «Խնդրում եմ, կամաց խոսեք, տղաները սահմանում կարող է լսեն»: Սա շատ դիպուկ էր ու սա ճիշտ»,-ասաց նա:

Անդրադառնալով ազգ-բանակին, Սարգսյանն ասաց, որ օրինագիծն այդ կոնցեպտի քաղաքականության դրսևորում է, բայց ինքն իրենով այդ կոնցեպտի առանցքը չէ:

«Ազգ-բանակի հայեցակարգը շերտ-շերտ բացելով առաջ ենք գնում: Հավատացեք, ավելի արագ, քան պատկերացնում եք, ազգ-բանակ գաղափարախոսությունը ստանալու է կիրառման և ներդրման շատ հստակ ժամանակցույցով պլան, որովհետև մենք այլընտրանք չունենք, եթե դա չանենք, տանուլ ենք տալու մեր ազգային գաղափարների, մեր անվտագության համար մեր կռիվը»,-ասաց նախարարը: