Ձեր վստահելի աղբյուրը

Հեռուստաալիքներն ունեն շատ մեծ դերակատարություն, հարկավոր է ուղղակի արմատախիլ անել, բնաջնջել հեռուստաեթերից տրվող ցածրորակ,  ցածրաճաշակ երաժշտությունը, -լրագրողների հետ հանդիպմանն ասաց ՀՀ ժողովրդական արտիստ Հասմիկ Պապյանը՝ պատասխանելով հարցին, թե ի՞նչը կարող է նպաստել Հայաստանում երաժշտաարվեստի զարգացմանը:

«Հարկավոր է մարդկանց վերադարձնել պատվախնդրությունը, որ այդպիսի երաժշտություն լսելը, մեղմ ասած, ամոթ է: Հարկավոր է վերադարձնել մարդկանց այն զգացումը, որ՝ «ասա ինչպիսի երաժշտություն ես լսում դու, ասեմ՝ ով ե»ս: Սա շատ կարևոր է, այդտեղից պետք է սկսել»,- նշեց նա:

Ասուլիսին ներկա ՀՀ ժողովրդական արտիստ, Պետական մրցանակի դափնեկիր  Տիգրան Մանսուրյանը  համաձայնեց Հասմիկ Պապյանի հետ՝ հավելելով միայն մի քանի նկատառումներ.

«Ենթադրում եմ, որ մեր կյանքում մուտք գործած շուկայական հարաբերությունները բոլոր բնագավառներում իշխող դեր ունեն: Մշակույթը ղեկավարող մարդկանց, մշակույթի մարդկանց  պարտքն է հնարավորինս խուսափել այս շուկայական հարաբերություններից արվեստի ներսում, արժեքներ գնահատելիս  շուկայական հարաբերությունները չդառնան առաջնորդողը, այլապես մենք ամբողջը հանձնելու ենք շուկային, իսկ շուկան միշտ չէ, որ հաշվի է նստում արժեքի հետ: Կամ ճիշտ հակառակը՝ շուկան ամբողջությամբ միտված է նրան, որ հնարավորինս էժան լինի, որ շատերն առնեն»:

Մաեստրոյի խոսքով՝ ինչ-որ ձևով պետք է առնել շուկայական հարաբերությունների դեմը: Երաժշտության բնագավառում Տիգրան Մանսուրյանը կարևորում է հոգևոր երաժշտության դերը:

«Մենք առ այսօր հոգևոր երաժշտությունը չդարձրեցինք մեր առօրյա երաժշտական կյանքի կարևոր բաղկացուցիչ մասը:  Դասական, հոգևոր երաժշությունը եթե չի մասնակցում մեր ամենօրյա երաժշտական իրականությանը, մեծապես զրկած ենք լինում այս գռեհկությունների դեմ միջոցներ գործադրելուց: Զրկված ենք: Եթե ուզում ենք գռեհկության դեմ քայլ անել, առաջին հերթին պետք է մեծապես հիմնվենք մեր արմատների վրա: Հոգևոր երաժշտության տեղը պետք է մեծացնենք»,- ասաց կոմպոզիտոր Մանսուրյանը:

Հայաստանի պետական կամերային նվագախմբի գեղարվեստական ղեկավար և գլխավոր դիրիժոր Ռոբերտ Մլքեյանի կարծիքով, էժանագին երաժշտությունն այնքան հզոր  է այսօր, որ ոչ մի ակադեմիական արվեստ չի կարող պայքարել դրա դեմ. «Ինչքան խոսում ենք, այնքան շատանում է»:

Նա որպես պայքարի միջոց է համարում հնարավորինս շատ ակադեմիական  արվեստ, դասական երաժշտություն սերմանելը հասարակության մեջ:

«Խորհրդային միություն ժամանակ դիկտատուրա կար. ճղված ջինսերով թույլ չէին տալիս ֆիլհարմոնիայի կամ օպերայի դահլիճ  գալ, ինչ ասես նվագել կամ երգել, ինչ-որ մեկի ծնունդն անել: Հիմա դա թույլատրված է: Մասսայաբար:  Դիկտատուրա է պետք, որ լինի ճիշտ արվեստ: Թող գնան ռեստորաններ ու ինչ ուզում են անեն, իսկ մեզ թողնեն մեր բեմը»,- ասաց Ռ.Մլքեյանը: