Ձեր վստահելի աղբյուրը

Ազգային ժողովում շարունակում է քննարկվել ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագիծը:

ԲՀԿ խմբակցության պատգամավոր Նաիրա Զոհրաբյանը նշեց, որ չկա ՀՀ որևէ քաղաքացի, որը դեմ լինի զինվորին և բանակին օգնելուն. «Խնդիրը վստահությունն է. վստահո՞ւմ ենք այն կառույցներին, որոնց միջոցով մեր 1000 դրամը պիտի փոխանցվի բանակին և զինվորին՝ ոչ»:

Նաիրա Զոհրաբյանը հիշեցրեց ԼՂՀ նախկին պատգամավոր Վահան Բադասյանի հայտարարությունը, թե ինքը պատրաստ է տրամադրել բանակը թալանած, կաշառակեր գեներալների անուններ, և զարմանում է, թե ինչու իշխանությունները և իրավապահ մարմինները չեն հետաքրքրվում այդ հարցով:

Պատգամավորը օրինագծի հարակից զեկուցող Կորյուն Նահապետյանին հարցրեց. «Չե՞ք կարծում, որ պետք է պատասխանատվության ենթարկել բանակի թալանով զբաղված անձանց, որպեսզի քաղաքացին տեսնի, որ մեր երկրում գործում է պատասխանատվության ինչ-որ մակարդակ, որից հետո միգուցե կարելի է խոսել վստահության վերականգնման մասին»:

Կորյուն Նահապետյանը նշեց, որ այս նախաձեռնության շրջանակներում ամենակարևորը վստահությունն է և պետք է ամեն ինչ անեն, որ վստահություն ձևավորվի նոր համակարգի շուրջ: Ինչ վերաբերում է պատասխանատվությանը, ապա, ըստ Կորյուն Նահապետյանի, դա չափազանց կարևոր է, բայց պետք է խոսել կոնկրետ փաստերով և դեպքերով:

«Եթե դուք անձամբ ունեք որևէ փաստ կամ կոնկրետ դեպք գիտեք, և կարող եք ներկայացնել համապատասխան ապացույցներ պաշտպանության համակարգում  որևէ պաշտոնատար անձի կողմից թույլ տրված չարաշահման հետ կապված, ապա հանդես եկեք հայտարարությամբ և ներկայացրեք կոնկրետ փաստեր: Եթե պարոն Բադասյանն իր տրամադրության տակ ունի կոնկրետ փաստեր, որ ԶՈՒ-ում թույլ են տրվել չարաշահումներ, իշխանության գերազանցում, որի հետևանքով վնաս է եղել պետությանը, ապա պետք է ներկայացնի այդ փաստերը իրավապահ մարմիններին»,- ասաց Կորյուն Նահապետյանը:

Նաիրա Զոհրաբյանն արձագանքեց, թե ինչո՞ւ պաշտոնանկ արվեցին ՊՆ-ի տարբեր բարձրաստիճան պաշտոնյաներ՝ մատակարարման ոլորտ, գնումներ, լավ աշխատելու համա՞ր պաշտոնանկ արվեցին:

«Ինձ կարո՞ղ եք բացատրել, ինչպե՞ս է, որ պաշտպանության ոլորտի տարբեր պաշտոնյաներ, գեներալներ ապրում են ցոփ ու շվայտ կյանքով: Իմ իմանալով՝ Բիլ Գեյթսը չեն, ՏՏ ոլորտում էլ հայտնագործություններ չեն արել և այդ ոլորտում որևէ ձեռքբերումներ չեն արձանագրել: Այդ դեպքում կարող եք բացատրել՝  որտեղի՞ց իրենց այս աստղաբաշխական ունեցվածքները»,- նշեց Ն.Զոհրաբյանը: 

Կորյուն Նահապետյանն ասաց, որ  ՊՆ տարբեր պաշտոնյաներ պաշտոնանկ էին արվել ծառայողական պարտականությունները ոչ պատշաճ կատարելու համար, բայց նրանց քրեական պատասխանատվության ենթարկելու համար բավարար հիմքեր պետք է լինեն, և եթե չկան ապացույցներ, ապա նման գնահատականներ հնչեցնելը ճիշտ չէ:

Նա նաև նշեց, որ եթե պատգամավորն ունի փաստեր, ուրեմն պետք է դիմի համապատասխան մարմիններին: