Ձեր վստահելի աղբյուրը

«Առաքելություն» կուսակցությունն առաջարկներ է ներկայացրել մարտական գործողությունների ընթացքում և մարտական հերթապահություն իրականացնող զինծառայողների զոհվելու կամ հաշմանդամություն ստանալու դեպքում պետական ապահովագրական վճարի ավելացման ծրագրի վերաբերյալ:

Կուսակցության տարածած հաղորդագրության մեջ նշվում է, որ կառավարության կողմից ներկայացված «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագիծը կազմված է հրատապ` առանց խնդիրների և խնդիրների լուծման մեխանիզմների իրական բացահայտման:

««Առաքելություն» կուսակցությունը գտնում է, որ նախ անհրաժեշտ է բացահայտել, հաշվառել զոհված, վիրավոր զինծայաղների խնդիրները, որից հետո զբաղվել գումարների հավաքագրմամբ` բյուջետային միջոցների անբավարարության դեպքում, չբացառելով նոր հարկային բեռի ավելացումը: Ընդ որում, օրենքը պետք է վերաբերվի բոլոր զոհվածներին և վիրավորներին` առանց ժամկետային սահմանափակման:

Սակայն, հաշվի առնելով, որ կառավարությունը օրինագիծը խորհրդարանի քննարկմանն է ներկայացրել հրատապ ռեժիմով, և փաստացի որևէ առարկայական քննարկում տեղի չի ունենում նաև խորհրդարանում, հարցի մասնակի լուծման համար, «Առաքելություն» կուսակցությունը առաջարկում է օրենքն ընդունել 4-րդ հոդվածի փոփոխությամբ, համաձայն որի հատուցման գումարները կվճարվեն  հատուցման այն դեպքերի համար, որոնք տեղի են ունեցել 2016 թվականի հունվարի 1-ից հետո,  նախատեսված 2017 թվականի հունվարի 28-ի փոխարեն:

Նշվածը հնարավորություն կտա որոշ չափով մեծացնել վստահությունը ներդրվող համակարգի վրա` հաշվի առնելով, որ միանգամից փոխհատուցում կստանան Ապրիլյան պատերազմի 100-ից ավել մասնակիցներ:

Ժամկետի փոփոխությունը չի առաջացնի ծախսերի զգալի աճ, քանի որ 2016թ. ընթացքում զոհվածներին և վիրավորներին փոխհատուցում տալու համար անհրաժեշտ կլինի միանվագ մոտ 1,5 մլրդ դրամ, իսկ մեկ տարվա ընթացքում հիմնադրամի նվազագույն մուտքերը կկազմեն մոտ 5 մլրդ դրամ:

Կուսակցությունը պատրաստ է ներկայացնել համակարգի բարելավմանն ուղղված քայլերի ամբողջական և մանրամասն առաջարկ»,-ասված է կուսակցության քաղաքական խորհուրդի հայտարարության մեջ: