Ձեր վստահելի աղբյուրը

Համակարգային փոփոխություն տեղի չի ունենում, ուղղակի միայն մարդիկ են փոխվում,-նման կարծիք հայտնեց ԱԺ պատգամավոր Էդմոն Մարուքյանը ԱԺ-ում իր ելույթի ընթացքում:

Նրա խոսքով, ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին նախագծի շուրջ բոլոր քննարկումները վստահության մասին են և այն մասին, թե՝ հնարավո՞ր է բյուջեից միջոցներ հատկացվեն:

«Պրոբլեմը կա, խնդիրը պետք է լուծել: Դրա համար երկու ճանապարհ կա՝  լուծել կամ հավաքագրվող միջոցների հաշվին, կամ էլ այն ճանապարհով, որն այսօր առաջարկում է պաշտպանության նախարարությունը»,-ասաց պատգամավորը:

Մարուքյանն ասաց, որ առաջարկներ ունի այդ վճարները բյուջեից հատկացնելու վերաբերյալ:

«Ես ուզում եմ կոնկրետ առաջարկով հանդես գամ: Երկար տարիներ բյուջեի միջոցները Հայաստանում անարդյունավետ ծախսվել են, հիմա մենք ունենք դրա արդյունքները: Հիմնադրամում առաջին տարվա ընթացքում հավաքագրվող գումարի չափը լինելու է 15 մլն դոլար: Առաջիկա 2-3 տարվա գումարի տեղը հիմա ասում եմ»,-ասաց Մարուքյանը:

Նա առաջարկեց վաճառել ՊԵԿ-ի կառուցած շենքը, որը հանձնվեց օրեր առաջ գույքի կառավարման վարչությանը:

«Եթե դա վաճառվի, գումարները կարող են ուղղվել այս հիմնադրամին: Դրան էլ գումարում ենք ոստիկանության արտաբյուջե գնացող միջոցները»,-ասաց Մարուքյանը:

Պատգամավորի ելույթն ամբողջությամբ՝ տեսանյութում: