Ձեր վստահելի աղբյուրը

Այսօր Շենգավիթ վարչական շրջանի ընդհանուր իրավասության դատարանում շարունակվեց ծննդկան Մերի Մարգարյանի և նրա դստեր մահվան գործով դատական նիստի քննությունը: Ինչպես նախորդ նիստերում, այնպես էլ այսօր շարունակվեցին վկաների հարցաքննությունը: Վկաներն այսօր նույնպես բժիշկներ էին:

«Շենգավիթ» բժշկական կենտրոնի հերթապահ բուժքույր Նինա Զոհրաբյանը դատարանում հայտնեց, որ հուլիսի 25-ին Մերի Մարգարյանը իր հարազատների հետ միասին եկել է բուժկենտրոն, որտեղ նրան ընդունել է օրվա հերթապահ մանկաբարձ-գինեկոլոգ Անի Բաբելյանը, որն այժմ ամբաստանյալ է: Մերին, ըստ վկայի, այստեղ բժիշկների ցուցումով տվել է անալիզներ՝ մեզի, արյան: Պարզվեց՝ Անի Բաբելյանը եղել է վիրահատության և երկար ժամանակ սպասեցրել է ծննդկան Մերի Մարգարյանին ու նրա հարազատներին:

«Մերի Մարգարյանը իրեն լավ էր զգում, տրամադրությունը լավ էր, ծիծաղում, ժպտում էր, եկավ նստեց, ճնշումը չափել ենք, ջերմաչափում ենք արել, չենք զգացել, որ վատ է: Մերին ասաց գրիպոզ վիճակ է մոտը, ջերմություն է ունենում», -դատախազի հարցերին ի պատասխան ներկայացրեց վկան:

Տուժող կողմի իրավահաջորդի ներկայացուցիչ, փաստաբան Մարինե Թովմասյանի հարցերին պատասխանելիս տիկին Զոհրաբյանը տեղեկացրեց, որ այդ օրն իրեն զանգահարել է Մերի Մարգարյանին հսկող մանկաբարձ-գինեկոլոգ Շուշանիկ Բախշյանը և տեղյակ պահել, որ Մերի Մարգարյանը գալու է ստուգման:

Փաստաբան Մարինե Թովմասյանը հետաքրքրվեց, թե ծանր հիվանդը չի՞ կարող ժպտալ, վկան արձագանքեց, որ կարող է, «բայց ինքը շատ բարեհամբույր էր»:

«Շատ չսպասեցին, Մերին ու նրա հարազատները մնացին շուրջ մեկ ժամ, սպասեցին անալիզներին, վերցրին անալիզների պատասխանը ու ասացին, թե կգնան ուրիշ բժշկի մոտ», -ասաց վկան:

Մյուս հարցերին ի պատասխան բուժքույրն ասաց, որ անալիզների պատասխանները բարձրացրել են Անի Բաբելյանի մոտ, որն այդ օրը Մերիի պատասխանատու բժիշկն էր և որը այդ ժամանակ վիրահատության էր: «Ասաց՝ վիրահատությունից հետո, կիջնեմ, կխոսեմ», -նրա պատմելով փոխանցել է Անի Բաբելյանը:

Փաստաբան Մարինե Թովմասյանը նկատեց, որ այդ անալիզները հայտնվել են Մերիի ու նրա հարազատների մոտ և հետաքրքրվեց՝ ինչպե՞ս է նման բան հնարավոր:

«Ես չեմ տվել փաստաթղթերը ոչ մեկին», -ասաց վկան: Նրա այս հայտարարությունը հակասություններ առաջացրեց, և տուժողի իրավահաջորդ Մերի Մարգարյանի հայրը՝ Վաղինակ Մարգարյանը, դատարանում հայտարարեց, որ անալիզները ստացել է նրանից: Սակայն վկան պնդեց, որ Մերի Մարգարյանի հորը որևէ փաստաթուղթ չի տվել:

Դատավորը հայտարարեց, թե ինչպե՞ս է հնարավոր՝ անալիզները չստանալ ու հեռանալ հիվանդանոցից: Վկան պատասխաններ չուներ: Դատավորի հարցապնդմանը, թե չի՞ տվել անալիզների պատասխանները Մերիի հարազատներին, վկան պատասխանեց. «Չեմ հիշում»:

«Շենգավիթ» բժշկական կենտրոնից Մերին ու հարազատները դուրս են եկել և գնացել «Արաբկիր» բժշկական կենտրոն: Դատարանում հարցաքննված հաջորդ բժիշկը «Արաբկիր» բժշկական կենտրոնի քիթ-կոկորդ-ականջի մասնագետ, բժիշկ Հերմինե Վլասյանն էր:

Նա պատմեց, որ երբ տեսել է Մերիին զարմացել է. «Ես նրան ասացի՝ ինչո՞ւ եք եկել այստեղ, չէ՞ որ սա մանկական հիվանդանոց է և պետք է նրան զննի մանկաբարձ-գինեկոլոգը: Նա էլ ասաց, որ իրենց բնակավայրին մոտ է ու ինքն էլ ուզում է, որ մանսագետը զննի իրեն, հասկանա ինչ խնդիրներ ունի: Շատ բարի, շատ գրագետ, բարեկիրթ աղջիկ էր»:

Բժշկի այս խոսքերը հուզմունք առաջացրին դատարանում, և Մերիի հայրը չդիմացավ, արտասվեց:

Բժիշկը պատմեց, որ Մերին այդ օրը հևում էր, շնչառությունը լավ չէր և ամենևին էլ առողջ մարդու տպավորություն չէր թողնում: Ասաց, որ դեղորայքային նշանակում չի կատարել, քանի որ դրա իրավասությունը չուներ: «Նա չէր կարողանում քայլել, մենք օգնել ենք, որ վերելակ նստի», -նկատեց բժշկուհին:

Պատասխանելով դատավորի հարցերին, Վլասյանն ասաց, որ Մերի Մարգարյանն ասել է, որ ջերմությունը բարձրանում է, «պարացետամոլ» է խմում, որը չի օգնում։ «Ես նրան ասացի, որ կարելի է պարացետամոլի դոզան մեծացնել, բայց դա պետք է անել միայն բուժող բժշկի հետ խորհդակցելուց հետո», -ասաց բժշկուհին:

Բժիշկների հարցաքննությունը կշարունակվի նաև դատական հաջորդ նիստում:

34.5 շաբաթական հղիություն ունեցող Մերի Մարգարյանը 2015-ի հուլիսի 23-ին դժգոհել էր բարձր ջերմությունից ու թուլությունից, սակայն նրան հսկող «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանը հորդորել էր խմել պարացետամոլ:

Մերիի բարձր ջերմությունը շարունակվել է մինչև հուլիսի 26-ը և հենց այդ օրն էլ որոշվել է նրան հոսպիտալացնել: Շարունակվող ջերմությամբ ծանր վիճակում գտնվող Մերիին հուլիսի 28-ին տեղափոխել են Էրեբունի բժշկական կենտրոն, որտեղ կատարվել է կեսարյան հատում: Նա մահացել է, նրանից մեկ օր անց՝  երեխան: Պաշտոնապես հայտարարվել էր, որ Մերին մահացել է «ՀԵԼԼՓ» (HELLP) սինդրոմից:

Այս գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերի Մարգարյանին ոչ պատշաճ բուժօգնություն ցուցաբերելու համար (ՀՀ Քրեական օրենսգիրք 130-րդ հոդվածի 2-րդ մաս):