Ձեր վստահելի աղբյուրը

«Արդեն երկու օր քննարկում ենք այս նույն հարցը: Ինչ մասին ասես՝ խոսեցինք այս հարցով: Հենց փորձեցինք ժողովրդի օգտին մի բան անել՝ էլ գող կատու, էլ քաչալ շուն, էլ ով ինչ գողացավ բանակից, ով ինչ տարավ բանակից»,- Ազգային ժողովում զինծառայողների կյանքին կամ առողջությանը պատճառված վնասների հատուցման մասին օրենքի նախագծի քննարկման ժամանակ ասաց պատգամավոր, ՀՀ բանակի գեներալ-մայոր Սեյրան Սարոյանը:

Նրա խոսքով՝ բանակից ով ինչ գողացավ, կերավ, քթներից գալու է. «Իրենց քթներից էլ դուրս չգա, իրենց երեխաների քթներից է դուրս գալու»:

«Դեռ չեմ լսել,  որ բանակի, զինվորի հաց գողացողները հանկարծ կրակի մեջ չընկեն. կամ երեխաները նարկոման են դառնում, կամ ղումարբազ, կամ կազինոներում այդ փողերը քամուն են տալի: Դա թողեք Աստծո հույսին: Բոլորս գիտենք, որ մեր պետությունը քյասիբ պետություն է, ասում ենք՝ խի պետական բյուջեն չի  տալիս այդ փողերը: Որ չունի՝ որտեղից տա:  Մարդուց բան ես ուզում, որ չունի», - ասաց պատգամավորը:

Ս.Սարոյանը շարունակելով խոսքը՝ նշեց. «Ասում ենք մեր գեներալները գող ավազակ են: Գյուղ կա, որ շուն  չլինի՞: Ենթադրենք 3-4 հոգի էլ անամոթ են, ինչ-որ բան են արել: Բա են 30-40 գեներալները, գնդապետները, ովքեր ծառայում են  այս բանակին, ծառայել են, փաստորեն պետք է ամաչեն այդ մարդիկ այդ ֆորման արդեն հանգնեն»:

Նրա խոսքով՝ դեռ գումարը չհավաքած, արդեն խոսում են կոռուպցիայի մասին:

«Ամենահեշտ  բանը ցեխ շպրտելն է, մարդուն վարկաբեկելն է: Ամոթ է, էսի սաղ ադրբեջանցիներն են նայում:  Ասում ենք ունենք հզոր, ուժեղ, ճիշտ բանակ ու ինչ ցեխ ասես, շպրտեցինք, ինչ-որ մի քանի անբարոյական մարդ կա այդ բանակում: Կան՝ հանել, շպրտել են դուրս: Պետք է, թող դատախազությունը  կանչի մարդկանց, ճշտի»,- նշեց Ս.Սարոյանը:

Գեներալ Սարոյանն ասաց, որ պետք է ժողովուրդը հույսը դնի իր վրա, ժողովուրդը պետք է լինի միասնական: