Ձեր վստահելի աղբյուրը

Սարի թաղում հուլիսին տեղի ունեցած դեպքերի վերաբերյալ նոյեմբերի 14-ին Գլխավոր դատախազության հաղորդագրությունը և թերթերից մեկին տված ոմն Գեղամ Սահակյանի հարցազրույցը Անդրիաս Ղուկասյանի փաստաբաններին հիմք է տվել եզրակացնել, որ նրա վերաբերյալ քրեական գործը միացնում են ՊՊԾ գնդի գրավման վերաբերյալ քրեական գործին:

Հիշեցնենք՝ դատախազությունը տարածած հաղորդագրությամբ տեղեկացրել էր, որ Սարի թաղում զանգվածային անկարգություններ կազմակերպելու և դրանց մասնակցելու դեպքի առթիվ հարուցված քրեական գործը ՀՀ գլխավոր դատախազությունը պահանջել է ՀՀ քննչական կոմիտեից և ուղարկվել ՀՀ հատուկ քննչական ծառայություն՝ ՀՀ ոստիկանության ՊՊԾ գունդը զավթելու և պատանդ վերցնելու դեպքերի վերաբերյալ քննվող քրեական գործին միացնելու և համատեղ քննություն կատարելու համար: Իսկ Գեղամ Սահակյանը «Առավոտ»-ին տված իր հարցազրույցում ասել էր, որ Անդրիաս Ղուկասյանի հետ առաջիկայում իրեն առերեսելու են:

Աղբյուրը գրել էր, որ քննչական կոմիտեն նրան արդեն երկու անգամ հարցաքննության է կանչել: Իսկ վերջին հարցաքննության ժամանակ Գեղամ Սահակյանը կոմիտեի ստորաբաժանումներից մեկի վարչության պետ Տոնոյանի կողմից զգուշացվել է. «Ինձ ասաց՝ դու մի քիչ զգույշ մնա, կամ քեզ ներքաշելու են կամ քո գլխին սարքելու են (խմբ. Նկատի ունի «Սասնա ծռերի» անդամներին)»,- Aravot.am-ին պատմել է Գեղամ Սահակյանը:

Այս ամենը Անդրիաս Ղուկասյանի փաստաբան Կարեն Մեժլումյանին հիմք է տվել եզրակացնել. «Զանգվածային անկարգություն կազմակերպելու վերաբերյալ Անդրիաս Ղուկասյանի նկատմամբ հարուցված քրեական գործը, ըստ էության, տապալվել էր և չէին կարող Ղուկասյանին բաց թողել, քանի որ առաջիկայում խորհրդարանական ընտրություններ են և դրա համար էլ ստիպված էին զանգվածային անկարգությունների մասով գործը միացնել ՊՊԾ գնդի վերաբերյալ քրեական գործին՝ արդարացնելու կալանքի տակ պահելը»:

Կարեն Մեժլումյանը Ղուկասյանի հետ առերեսված Գեղամ Սահակյանին որակեց «գործակալ» և ասաց, որ պարզել են՝ ով է իրականում նա: Փաստաբանի խոսքով Սահակյանը նախկինում 2 անգամ դատված է՝ խարդախության և փաստաթղթեր կեղծելու համար:

Փաստաբանը պարզել է նաև, որ Սահակյանը հոգեկան առողջության հետ կապված խնդիրներ ունի և այդ պատճառով էլ պայմանական պատիժ է կիրառվել նրա նկատմամբ:

Մեժլումյանի խոսքով, Ղուկասյանը և Սահակյանը միմյանց հետ հարաբերություններ չեն ունեցել և նախկինում միմյանց չեն ճանաչել, արդեն առերեսվել են:  Բայց փաստաբանը նախաքննության գաղտնիության սկզբունքից ելնելով, չմանրամասնեց, թե ինչ հարցերի շուրջ է առերեսումը կատարվել:

Այդուհանդերձ, փաստաբանը վստահ է, որ «սուտ ցուցմունքների» հիման վրա հարուցված քրեական գործը և դրանք ՊՊԾ գնդի գրավման մասին գործին միացնելը «կջախջախվի»:

«Այդ գործերը միացնելու մասին որևէ պաշտոնական տեղեկություն չենք ստացել», -լրացրեց Ղուկասյանի մյուս պաշտպանը՝ Ինեսսա Պետրոսյանը:

Ղուկասյանի պաշտպանական խումբը վստահ է, որ «Ոտքի Հայաստան» քաղաքացիական շարժման անդամ Անդրիաս Ղուկասյանին նման գործերի մեջ ներքաշելով, փորձում են մեկուսացնել քաղաքական իրադարձություններից: 

Մեր հարցին, թե արդյոք նա մտադի՞ր էր մասնակցել գալիք գարնանը կայանալիք խորհրդարանական ընտրություններին, Ինեսսա Պետրոսյանը պատասխանեց. «Նա քաղաքական գործիչ է և բոլոր հիմքերն ուներ ընտրություններին մասնակցելու համար»: