Ձեր վստահելի աղբյուրը

Սննդամթերքի անվտանգության ոլորտում չի կարող տարբերակված մոտեցում լինել: Հայտարարել է ԳՆ սննդամթերքի անվտանգության պետական ծառայության պետ Իշխան Կարապետյանը ՍԱՊԾ ստորաբաժանումների ղեկավարների հետ անցկացրած առաջին խորհրդակցության ժամանակ:

«Բոլորի համար մոտեցումը հավասար է լինելու, խաղի կանոնները՝ նույնը, իրականացվելու են գնահատված ռիսկի վրա հիմնված հստակ ու կոշտ միջոցառումներ, ուժեղացվելու է վերահսկողությունը, բացառվելու են հնարավոր կոռուպցիոն ռիսկերը և այդ ուղղությամբ իրականցվելու են հետևողական քայլեր»,-ասել է նա:

ՍԱՊԾ մամուլի ծառայության հաղորդմամբ, Իշխան Կարապետյանը նշել է, որ ոլորտում կան թե բազմաթիվ խնդիրներ, թե ձեռքբերումներ: Նա առանձնացրել է խնդիրները ըստ գործունեության երեք ոլորտների՝ սննդամթերքի անվտանգություն, անասնաբուժություն և բուսասանիտարիա:

Առաջին խնդիրը, որն առնչվում է սպառողին՝ սննդամթերքի անվտանգությունն է: Ծառայության պետի խոսքով՝ ՍԱՊԾ-ն շատ խիստ է վերաբերվելու բոլոր խախտումներին՝ թե սպառողի սեղանին դրվող առաջնային սննդամթերքի, թե տնտեսավարողների կողմից արտադրության մեջ օգտագործվող հումքի:
«Մենք պետք է ձգտենք, որ Հայաստանի Հանրապետությունում արտադրվող և իրացվող սննդամթերքը լինի անվտանգ ու որակյալ»,-ասել է նա:

Անդրադառնալով սննդամթերքի անվտանգության խնդրին տնտեսավարողների տեսանկյունից՝ Իշխան Կարապետյանը համոզմունք է հայտնել, որ նաև նրանց շահերից է բխում արտադրել որակյալ սննդամթերք` ինչպես տեղական, այնպես էլ արտաքին շուկայում այն դարձնելով առավել մրցունակ:

Բուսասանիտարիայի ոլորտում առանձնացվել են մի շարք խնդիրներ, տրվել են հստակ հանձնարարականներ: Նա ընդգծել է սահմանային հսկողության կարևորությունը և հանձնարարել է խստացնել այն՝ բացառելով վտանգավոր սննդամթերքի ներմուծումը հանրապետություն:
«Ամեն ինչ անելու ենք, որ տնտեսավարողը չունենա դժգոհություն, բայց միաժամանակ պետք է երաշխավորենք երկիր մտնող սննդամթերքի անվտանգությունը»,- եզրափակել է Ի. Կարապետյանը:

Ընդգծվել է, որ իրականացվելու է խիստ, բայց արդարացի քաղաքականություն. նախ՝ լայնամասշտաբ դիտարկումներ ու դրանց միջոցով վտանգի գնահատում է իրականացվելու, ապա՝ տնտեսավարողին տրվելու է ժամանակ ու հնարավորություն, նաև՝ խորհրդատվություն, արձանագրված խախտումները վերացնելու համար: Հետևություններ չանելու դեպքում՝ Ծառայությունը կլինի խիստ և կկիրառի օրենսդրությամբ տրված բոլոր լծակները՝ առանց վերապահումների: