Ձեր վստահելի աղբյուրը

Այսօր Ազգային ժողովում ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագծի քննարկման ժամանակ,  ՀՅԴ խմբակցության ղեկավար Արմեն Ռուստամյանը  ողջունեց պաշտպանության նախարարի այս նախաձեռնությունը, որ, առանց ժամանակ կորցնելու, փորձում է «միս ու արյուն հաղորդել ազգ-բանակ գաղափարին, որի վրա պետք է հենվի մեր պաշտպանությունն ու բանակաշինությունը»:

Նրա խոսքերով՝  դա շատ լուրջ գործընթաց է, որի սկիզբը դրվում է այսպիսի  քայլերով, քանի որ դրա հետ է կապվում ազգային տուրքի գաղափարը և դա մի քայլ է,  որ հնարավորություն է տալիս խոսել ընդհանրապես այդ գաղափարի կարևորության մասին:

Արմեն Ռուստամյանը նշեց, որ դաշնակցական տեսաբաններից Միքայել Վարանդյանը դեռ 1910-ին հրապարակել է մի աշխատություն, որում վերլուծելով հայ ժողովրդի վիճակը և թշնամական միջավայրը,  հանգել է այն եզրակացության, թե ինչպես պետք է հայ ժողովուրդը, հույսը իր վրա դնելով, կառուցի իր պաշտպանությունը:

«Դա նույն ազգ-բանակ հասկացությունն է, որ հայ ժողովուրդը պետք է ունենա  համաժողովրդական բանակ և յուրաքանչյուրը պետք է բանակաշինության մաս կազմի: Այսինքն՝  դա մի հայեցակարգ է, որ ցանկացած հայ ցանկացած պահի պետք է լինի թե բանակի շինարար, թե բանակի զինվոր»,- ասաց Արմեն Ռուստամյանը:

Իսկ բոլոր այն քննադատությունները, որոնք հնչում են գաղափարն ընդունող մարդկանց կողմից, բայց ասում են, որ շտկումներ են պետք, պատգամավորը ողջունում է, քանի որ դրանք կառուցողական, սրտացավ մոտեցումներ են: Իսկ նրանք, որոնք մերժում են գաղափարը, ապա, ըստ Արմեն Ռուստամյանի, երևի լավ չեն հասկացել, թե ինչ միջավայրում ենք ապրում, ինչ մարտահրավերներ կան, որ պետք է ազգովի հաղթահարենք:

«Հիմա թշնամու ջրաղացին պետք չէ ջուր լցնել, պառակտող բաներ ասել: Նա այս գաղափարից սարսափելու է, հենց տեսնի, որ հայ ժողովուրդը նորից համախմբվել է իր սրբության սրբոցը համարող բանակի պաշտպանության շուրջ, նա ռիսկ չի անի մեր վրա հարձակվել: Այս հարցն է, որ մենք լուծում ենք, դրա համար մենք ողջունում ենք պաշտպանության նախարարի՝ առանց հապաղելու ազգ-բանակ հասկացությունը գործի դնելը, որը պետք է մենթալիտետ փոխի, որը պետք է բոլորիս սովորեցնի՝ ինչպես դառնանք ազգ-պետություն»,- նշեց ՀՅԴ խմբակցության ղեկավարը:

Պատգամավորն ընդունում է, որ կա անվստահության մթնոլորտ, որն իր ծանրությամբ նստել է բոլորի վրա. «Բայց մենք կնմանվենք այն մարդուն, ով անընդհատ դժգոհում է խավարից` մի մոմ վառելու փոխարեն: Ո՞վ պետք է խավարը ցրի, դու քո չափով քո մոմը վառիր և ազգովի էլ պահանջենք, որ ով 1000 մոմանոց լամպ ունի, նա էլ վառի, ստիպենք, որ նա դա անի: Եթե չի անում, էդ լամպը ձեռից պետք է առնենք, եթե չի հասկացել, որ էդ լամպը գյոռը չի տանելու, չի հասկացել, որ վերջում էդ լամպը իր թշնամին է ձեռքից առնելու, եթե չի վառում էդ լամպը»,- ասաց Արմեն Ռուստամյանը՝ հավելելով, որ իսկապես խնդիրներ կան, բայց դրանք պետք է զուգահեռ լուծել, բայց այսօր առաջնահերթը պաշտպանության հարցն է:

Եզրափակելով խոսքը՝ պատգամավորն ասաց, որ ՀՅԴ-ն կողմ է քվեարկելու նախագծին: