Ձեր վստահելի աղբյուրը

Երևանի Կոնդ թաղամասի շուրջ 1500 քաղաքացիներ ե՞րբ են ստանալու իրենց բնակարանները, շուրջ 8-9 տարի փողոցում են գտնվում, քանի որ 2007 թվականին  Կոնդ թաղամասը ճանաչվել է որպես գերակա հանրային շահ,- Ազգային ժողովում կառավարության հետ հարոցուպատասխանի ժամանակ նման հարցով կառավարությանը դիմեց պատգամավոր Զարուհի Փոստանջյանը:

Տարածքային կառավարման և զարգացման նախարար Դավիթ Լոքյանն ասաց, որ 2007 թվականից սկսված  ծրագիրն առաջին փուլում ձախողվել էր, արդյունքում կառավարությունը 2012 թվականին ստիպված է եղել նոր միջոցներ, գործիքներ փնտրել, որպեսզի քաղաքացիների բնակարանային ապահովության խնդիրներին լուծում տա:

«Լիբանանից Հայաստանում գործունեություն սկսած օտարերկրացի ներդրողը ներդրում էր արել, հետո ձախողել էր: 2012 թվականին կառավարությունը պրոբլեմը վերցրել է իր վրա: Առ այսօր խնդիրը վերջնական լուծում չի ստացել»,- նշեց նախարարը:

Դ.Լոքյանի խոսքով՝ համապատասխան կառուցապատողների կողմից տեղեկացվել է, որ 2017 թվականի հոկտեմբերին 1860 քմ. տարածքով բնակտարածքը վերջնական շահագործման կհանձվի բնակիչներին:

«70 ընտանիքի գույքը, որը վերցված  էր, փոխանցվել է բնակիչներին: Երկրորդ շենքը՝ շուրջ 1500 քմ տարածքով, հնարավոր է,  որ չկառուցվի, քանի որ բնակիչների մեծ մասը հրաժարվում են  և իրենց գումարները ստանում են: 310 միլիոն դրամ համապատասխան փոխհատուցում եղել է, այս ամիս, ինձ ներկայացված  տեղեկությունների  համաձայն, 100 միլիոն դրամի լրացուցիչ փոխհատուցում կլինի բնակիչներին»,-  նշեց  տարածքային կառավարման և զարգացման նախարարը:

Նա նշեց, որ  բնակիչներին  ամեն ամիս 70-90 հազար դրամ է տրվում՝ վարձակալած բնակարանների վարձը վճարելու համար:

«Ձախողված  ծրագիրն այս ձևով փրկվում է, մեր քաղաքացիները մեկ շենքում կարողանում են ստանալ 1860 քմ. բնակտարածություն, մյուսները ստանում են փոխհատուցում՝ գումարի տեսքով՝ այլ վայրում, այլ ձևով բնակարանային խնդիրները լուծելու համար»,- ասաց Դավիթ Լոքյանը: