Ձեր վստահելի աղբյուրը

2016 թվականին տնտեսական աճը, ընդհանուր առմամբ,  ձևավորվել է համաշխարհային տնտեսության աճի դանդաղ տեմպերի պահպանման և Հայաստանի տնտեսությունում արտահանելի հատվածի աճի պայմաններում: Այս մասին Ազգային ժողովում ՀՀ 2017թ. պետական բյուջեի նախագծի քննարկմանն ասաց ՀՀ Կենտրոնական բանկի նախագահ Արթուր Ջավադյանը՝  ներկայացնելով բյուջեի նախագծի վերաբերյալ ԿԲ եզրակացությունը:

Արթուր Ջավադյանի խոսքերով՝ տնտեսական աճի զարգացումները, այս տարվա ութ ամիսների ընթացքում, ընթացել են աստիճանական նվազման ուղղությամբ: Այդ ժամանակահատվածում շարունակվել է թույլ ներքին պահանջարկի ձևավորումը, որը դրսևորվել է ինչպես մասնավոր սպառմանն ուղղված ծախսերի կրճատման, այնպես էլ ներդրումային թույլ միջավայրի պահպանմամբ: «Սակայն ներքին պահանջարկի թույլ միջավայրն էականորեն մեղմվել է՝ սկսած 2015 թվականից: Արտահանման աճի միջոցով հնարավոր եղավ նպաստել տնտեսական աճի ձևավորմանը, և ընթացիկ հաշվի պակասուրդի կրճատման արդյունքում զգալիորեն նվազեցնել երկրի արտաքին խոցելիությունը»,- նշեց Արթուր Ջավադյանը:

ԿԲ նախագահի խոսքերով՝ ուղղորդվելով մակրոտնտեսական կայունության ապահովման սկզբունքներով,  2017թ-ի պետական բյուջեի նախագիծն արտացոլում է  նաև ՀՀ կառավարության ծրագրի հիմնադրույթները:

Ըստ նրա՝ 2017թ-ին նախատեսվում է տնտեսական աճի տեմպերի արագացում  3.2%-ով, ինչը պայմանավորված է ինչպես արտաքին զարգացումներով, մասնավորապես, ՌԴ տնտեսական աճի որոշակի զարգացման միտումներով, այնպես էլ 2017թ-ին իրականացվող մի շարք բարեփոխումների և  2016թ-ին արդեն իսկ իրականացված խթանող հարկաբյուջետային, դրամավարկային քաղաքականությունների ազդեցությամբ:

Մանրամասները՝ տեսանյությում: