Ձեր վստահելի աղբյուրը

«Հորիզոն-2020»-ի ծրագրերի իրականացումը շարունակվելու է մինչև 2020թ. և ընդգրկում է 3 գերակա ուղղություն` գիտության գերազանցություն, արդյունաբերական առաջնորդություն և հասարակական մարտահրավերներ: Այս մասին այսօր Երևանում մեկնարկած Արևելյան գործընկերության 8-րդ ոչ պաշտոնական նախարարական երկխոսության ձևաչափով հանդիպումից հետո հրավիրած ասուլիսի ժամանակ ասաց ՀՀ ԿԳ նախարար Լևոն Մկրտչյանը:

Նա տեղեկացրեց, որ ՀՀ պետական գիտական կազմակերպություններից և բուհերից 30-ը կարող են մասնակցել «Հորիզոն-2020»-ի շրջանակներում անցկացվող թեմատիկ մրցույթներին և շահել դրամաշնորհներ. «Ծրագրերին մասնակցելը շատ կարևոր է մեր գիտնականների համար, քանի որ այն կնպաստի մեր` եվրոպական հետազոտական տարածքին ինտեգրմանը: Ծրագրերին մասնակցության և այլ հարցերի պատասխանները մեր մասնակիցներին ապահովելու համար առաջիկայում մենք Հայաստանում գրասենյակ կբացենք»:

Հարևանության քաղաքականության և ընդլայնման հարցերով ԵՄ հանձնակատար Յոհաննես Հանը նշեց, որ սա իրենց շարունակական ջանքերն են Արևելյան գործընկերության երկրներն ավելի սերտորեն կապել Եվրոպական միության հետ. «Ամենակարևորն այստեղ տնտեսական զարգացումներին սատարելն է, իսկ դա հնարավոր է միայն եթե, որակյալ աշխատուժ ունես: Սա էլ իր հերթին ենթադրում է, որ պետք է որակյալ գիտնականներ ունենաս: Մենք պետք է օգտվենք գիտահետազոտական աշխատանքների ու նորարարության ներուժից, որն արդեն առկա է, բայց և ամեն օր կյանքում ավելին հնարավոր է անել»:

Նրա խոսքով՝ «Հորիզոն-2020» կոչվող սպառիչ և համապարփակ գիտական ծրագիրը  նախատեսված է նաև ԵՄ անդամ չհանդիսացող երկրների հետ համագործակցելու համար, քանի որ գիտության ասպարեզում սահման չպիտի լինի:

«Երկխոսության  արդյունքում Հայաստանում` գիտության և կրթության ոլորտում, նոր ծրագիր կյանքի կոչելու որոշում են կայացրել: Ծրագիրը կկոչվի «Եվրամիությունը` հանուն նորարարության», որի միջոցով կփորձեն նորարարությունների իրականացման համար ֆինանսավորման հարցերը լուծել»,-տեղեկացրեց հետազոտության, գիտության և նորարարության ԵՄ հանձնակատար Կարլոս Մոեդաշը:

Հանդիպմանը ներկա Ուկրաինայի կրթության և գիտության նախարար Լիլիա Գրինևիչը ներկայացրեց, որ  2015 թվականին իրենց երկիրը ստորագրել է «Հորիզոն-2020»-ի հետ ասոցացման համաձայանգիրը և մասնակցել է 64 ծրագրի՝ 19,5 կես միլիոն ընդհանուր գումարով. «Ծրագրի հնարավորությունները շատ են, բայց պետք է տքնաջան աշխատել՝ դրանցից օգտվելու համար»:

Լրագրողների հարցին, թե ինչ ձևաչափով պետք է գիտնականները դիմեն ծրագրին՝ դրամաշնորհ ստանալու համար, Հետազոտության, գիտության և նորարարության ԵՄ հանձնակատար Կարլոս Մոեդաշը պատասխանեց, որ որ բոլոր մակարդակներով կարող են դիլմել՝ թե անհատական, թե կազմակերպություններ, ձեռնարկություններ և անգամ  տարբեր երկրների գիտնականները կարող են համատեղ դիմել համատեղ ծրագրերով:

«Ամեն երկրում կա կապի գրասենյակ, անկախ փորձագետներից կազմված հանձնաժողով, որոնք գնահատում են ստացած առաջարկները: Եթե ներկայացված գաղափարը որակյալ է և դրական գնահատականի է արժանանում, այն կարող է մինչև 50 հազար եվրոյի դրամաշնորհ ստանալ: Իսկ հետո, երբ այդ գաղափարը երկու տարվա դառնում է ձեռնարկություն և ապագայի համար խոստումնալից նորարարություն է պարունակում, արդեն խոսքը կարող է գնալ մինչև 2-3 մլն եվրո դրամաշնորհի մասին»: