Ձեր վստահելի աղբյուրը

«Մեր առաջնահերթ խնդիրն է լինելու երաշխավորել, որ արտադրվող սննդամթերքն անվտանգ լինի, բացառել իրացման ցանցում հնարավոր խախտումները»: Սննդամթերքի անվտանգության պետական ծառայության մարզային կենտրոնների ղեկավարների հետ հանդիպմանը հայտարարել է ՍԱՊԾ պետ Իշխան Կարապետյանը:

«Ցանկալի արդյունքի հասնելու համար անհրաժեշտ է բոլորիդ  ամենօրյա հետևողական աշխատանքը, ինչպես նաև կոռուպցիոն հնարավոր ռիսկերի բացառումը»,-ասել է ծառայության պետը:

ՍԱՊԾ մամուլի ծառայության փոխանցմամբ, Իշխան Կարապետյանն ընդգծել է, որ մարզերում խախտումները հաճախ կարող են լինել չիմացության արդյունք և պետք է տնտեսավարողների հետ նախ քննարկումներ կազմակերպել,  խոհրդատվություն և հնարավոր խախտումները շտկելու հնարավորություն տալ՝ չառաջնորդվելով անմիջապես պատժելու սկզբունքով: Հետևություններ չանելու դեպքում՝ Ծառայությունը կլինի խիստ և կկիրառի օրենսդրությամբ տրված բոլոր լծակները՝ առանց վերապահումների: Ծառայության պետն ընդգծել է որ տարբերակված մոտեցում չի լինելու, խաղի կանոնները նույնն են լինելու բոլոր տնտեսավարողների համար:

Մարզային կենտրոնների ղեկավարներին հանձնարարել է hաշվառել մարզում գործող սննդի շղթայի օպերատորներին, գնահատել կազմակերպություններն ըստ ռիսկայնության, դիտարկումներ և մշտադիտարկումներ իրականացնել, հատուկ ուշադրություն դարձնել մանկապարտեզների, դպրոցների, մանկական սրճարանների սննդի որակին, մսի վաճառքի կետերում հետևել սանիտարահիգիենիկ պայմաններին, ապահովել կատարված աշխատանքների վերաբերյալ հաշվետվողականություն շաբաթական կտրվածքով:

Ծառայության ղեկավարը հորդորել է նաև հատուկ ուշադրություն դարձնել սպառողների դիմում-բողոքներին և oպերատիվ արձագանքել բոլորին: