Ձեր վստահելի աղբյուրը

Խորհրդարանական կառավարման պարագայում Հայաստանի անվտանգությունը ավելի հուսալիորեն ապահովված կլինի: «Սպուտնիկ Արմենիա»-ի փոխանցմամբ` «Ռուսաստանն այսօր» միջազգային տեղեկատվական գործակալության գործադիր տնօրեն Դմիտրի Կիսելյովին տված հարցազրույցում ասել է ՀՀ նախագահ Սերժ Սարգսյանը:

«Կարծում եմ, ամեն դեպքում կառավարման նման ձևը կհանգեցնի նրան, որ Հայաստանի անվտանգությունը ավելի հուսալիորեն կապահովվի»,-նշել է ՀՀ նախագահը:

Երկրի ղեկավարի  խոսքով՝ շատ երկրներում ձևավորվել է այն կարծիքը, թե Հայաստանում գործում էր կառավարման նախագահական համակարգ, իսկ հիմա երկիրը անցում է կատարում խորհրդարանական կառավարման:

«Դա այդպես չէ։ Մենք ունեինք կիսանախագահական կառավարման ձև, և ինչպես բոլոր կիսաձևերը, այն իր թերություններն ունի։ Միայն այն բանի շնորհվ, որ գործող նախագահը խորհրդարանում մեծամասնություն ունի, հնարավոր է դառնում երկրի կայուն կառավարումը։ Ինչու՞։ Որովհետև կիսանախագահական համակարգում կառավարությունը ձևավորում է խորհրդարանը։ Եվ եթե պատկերացնենք, որ նախագահը կարող է ներկայացնել մի քաղաքական ուժ, իսկ խորհրդարանական մեծամասնությունը՝ այլ, ապա հասկանալի է, որ կառավարության և նախագահի միջև վատ հարաբերություններ կլինեն»,– նշել է Սերժ Սարգսյանը:

Նա  հիշեցրել է, որ նախագահը նաև գերագույն գլխավոր հրամանատարն է և կրում է երկրի անվտանգության և ամբողջականության համար պատասխանատվությունը։

«Եվ բոլորիս էլ հասկանալի է, որ գերագույն գլխավոր հրամանատարի գործառույթն այն չէ, որ քարտեզի վրա սլաքներ նշի, թե ուղղությամբ պետք է շարժվեն զորքերը։ Նրա խնդիրն է ապահովել պետության ամբողջ ռեսուրսը ռազմաքաղաքական խնդիրների լուծման համար։ Իսկ ինչպե՞ս նա կարող է դա անել, եթե իրավունք չունենա բյուջետային միջոցների մի մասը ծախսել այդ նպատակով։ Սա մեկ։ Եվ երկրորդը՝ ինձ թվում է, որ ստեղծված իրավիճակում ավելի ճիշտ է, որ իրավունքը լինի այնտեղ, որտեղ  պատասխանատվությունն է»,– ասել է նա։

ՀՀ նախագահը կարծում է, որ խորհրդարանական վերահսկողությունը շատ արդյունավետ կառավարման ձև է համակարգերի և կառույցների համար, որոնք ունեն իրավունքներ և պատասխանատվություն ։