Ձեր վստահելի աղբյուրը

«Աշտարակ կաթ» ընկերությունը, որը կաթնամթերքի շուկայում ունի մեծ մասնաբաժին, այսօր հայտնվել է ծանր ֆինանսական վիճակում, ունի գյուղացիական տնտեսություններին կուտակած պարտքեր,-կաթնամթերք արտադրող ընկերությունների ներկայացուցիչների հետ հանդիպմանը հայտարարել է գյուղատնտեսության նախարարի տեղակալ Ռոբերտ Մակարյանը:

Նա նշել է, որ   «Աշտարակ կաթ» ընկերության գործունեության դադարեցման պատճառով խնդիրներ են առաջացել և հարկավոր է քայլեր ձեռնարկել, որպեսզի մթերումների գործընթացը չընդհատվի,  ստեղծված իրավիճակի արդյունքում գյուղացիները չտուժեն»:

ԳՆ հասարակայնության հետ կապերի վարչության հաղորդմամբ, Մակարյանը հավելել է, որ խնդիրն ունի շուտափույթ լուծման կարիք, քանի որ այն ժամանակին չկարգավորելու դեպքում հաջորդ տարվա գարնան և ամռան ամիսներին կաթի արտադրության ծավալների ավելացմանը զուգահեռ կարող են առաջանալ մթերման հետ կապված լուրջ խնդիրներ:

Միաժամանակ նա  հորդորել է լրացուցիչ քանակի մթերումներ իրականացնելիս թույլ չտալ գնի նվազեցում:

Ըստ աղբյուրի, հանդիպման մասնակիցները տեղեկացրել են, որ իրենց ընկերությունները պատրաստ են իրականացնել լրացուցիչ մթերումներ` կաթի ավելցուկից հարկ եղած դեպքում չոր կաթի կամ պանրի արտադրություն կազմակերպելու նպատակով: