Ձեր վստահելի աղբյուրը

«Մեր վիճակն իսկապես ծանր է, խիստ համարձակություն է պետք  նայել իրականությանն ուղիղ աչքերով, որից հետո համարձակ քայլեր իրականացնել, ստանդարտ լուծումները չեն օգնի»,- Ազգային ժողովի արտահերթ նիստում 2017 թվականի բուջեի նախագծի քննարկմանն ասաց ՀԱԿ  խմբակցության քարտուղար Արամ Մանուկյանը:

Նա նշեց, որ Հայաստանում պետական ապարատն ուռճացված է:  Համեմատության համար ասաց, որ գործադիր, օրենսդիր, դատական իշխանությունների բյուջետային ֆինանսավորումը 2010 թվականին եղել է 12 միլիարդ դրամ, 2017-ի համար նախատեսվել է շուրջ 22,7 միլիարդ դրամ: Աշխատողների ընդհանուր թիվը 2010-ին եղել է 15-16 հազար,  եկող տարվա համար նախատեսված է 18 հազար 300 մարդ:

Ա.Մանուկյանը  ասաց, որ Հայաստանում կա 1100 հարկային տեսուչ,  որոնք սպասարկում են 80 հազար հայաստանյան կազմակերպություն: Վրաստանում կա  1400 հարկային տեսուչ, սպասարկում են 413 հազար կազմակերպության:

«Իմ խնդիրը այն չէ, որ պետք է կրճատեք այս մարդկանց: Ամենևին: Պետական մտածողության մարդ եմ: Եթե կրճատենք, արտագաթը կավելանա:  Կա մեկ այլ լուծում: Պետք է գնաք այլ ճանապարհով՝ավելացնեք մուտքերը, քանի որ մեր մարտահրավերը լրիվ այլ տեղ է: Այս մարդիկ կան, ավելանում ենք, նրանց սպասարկողն ու կերակրողն է պակասում: Տարեկան 50 հազարով  պակասում է այն դաշտը, որը պահում է այս ապարատը»,- նշեց պատգամավորը:

Ա.Մանուկյանի ներկայացրած տվյալների համաձայն՝ 2014-ին Հայաստանում Նոր տարվա համար մանր առևտրաշրջանառությունը կազմել է 221 միլիարդ դրամ, 2015-ին 18 տոկոսով պակասել է և կազմել 178 միլիարդ դրամ:

«Այս տարի շատ ավելի տխուր է, գրեթե ամեն ամիս 4 տոկոսով մանր առևտուրը պակասում է»,-  ասաց ընդդիմադիր պատգամավորը: