Ձեր վստահելի աղբյուրը

«Գյուղատնտեսության մեջ խնդիրները շատ են: Գրեթե բոլոր ոլորտներում ունենք խնդիրներ»,- Ազգային ժողովի արտահերթ նիստում 2017 թվականի բուջեի նախագծի քննարկմանն ունեցած արտահերթ ելույթում ասաց գյուղատնտեսության նախարար Իգնատի Առաքելյանը:

Նախարարը կարևորեց անասնաբուժության զարգացումը. «Մի կողմից Համաշխարհային  բանկից  վարկ ենք վերցնում՝ զարգացնելու անասնապահությունը, մյուս կողմից ուշադրություն չդարձնելով  անասնաբուժությանը, մեծ հետևանքներ կարող է ունենալ հետագա անասնապահության զարգացման վրա»,- նշեց նախարարը:

Ի. Առաքելյանի խոսքով՝ տարածքային կառավարման և զարգացման նախարարի հետ աշխատում են, որպեսզի մարզերում ունենան հաստիքներով հաստատված անասնաբույժներ:

Գյուղատնտեսության նախարարը նաև կարևորեց խորհրդատվության մակարդակի բարձրացումը. «Խորհրդատվության բացակայության պատճառով չկա ֆերմերային տնտեսությունների զարգացում, կարիք ունենք բարձրացել խորհրդատվությանը, որպեսզի ֆերմեներին ցույց տրվի նոր տեխնոլոգիաները, ուղղություն տրվի՝  ինչպես զարգացնել բիզնեսը: Այլապես մնում է կամայական  մակարդակով կամ զուտ ամեն մեկն իր կարդացած կամ հայտնաբերած գրականությամբ»:

Ինչ վերաբերում է մթերումներին, Ի Առաքելյանն ասաց, որ, հանդիպելով գյուղացիների, ֆերմերների,  վերամշակողների հետ, գրեթե համոզված է, որ պետք է խորհուրդներ, խմբեր ստեղծվեն:

«Չենք  կարող այս դաշտում լինել լիբերալ: Ինչքան լիբերալ լինենք, այդքան դաշտը լինելու է անկառավարելի, մենք գնալու ենք գյուղատնտեսության մեջ կոլապսի:

Վարաչապետի հանձնարարությամբ աշխատում եմ արդեն պետություն-մթերող-գյուղմթերք արտադրող շղթան ստեղծելու ուղղությամբ: Խորհուրդների, խմբերի միջոցով կկարողանանք կանոնակարգել մինիմալ գին, որակի դասակարգում: Եթե չմիանանք եռակողմ, չենք կարողանալու փրկել գյուղատնտեսությունը»,- նշեց նա:

Գյուղատնտեսության ոլորտի պատասխանատուն խոսեց նաև սուբսիդավորման մասին՝ նշելով, որ միայն ազոտային պարարտանյութ տալով չեն կարող ապահովել որակյալ բերք:

«Մենք պետք է նոր մեխանիզմներ ներկայացնենք, առաջարկենք ֆերմերներին, որպեսզի շահագրգռված լինեն արտադրել որակով արտադրանք: Մենք չենք կարող մրցել խոշոր գյուղատնտեսություն ունեցող երկրների հետ,  բայց կարող ենք մրցել մեր համբավով, անունով, մեր մթերքի որակով:  Հայկական անունը հարգված է նույն ԵԱՏՄ երկրներում: Միայն հայկական անուն դնելով՝ շատ բիզնեսներ առաջ են գնում: Դա պետք է օգտագործել, դարձնել արժեք: Երկար ժամանակ է  պետք, որ գյուղմթերքը դառնա որակով: Միգուցե շատ չլինի, թանկ լինի,  բայց լինի որակով»,- ասաց Ի.Առաքելյանը: