Ձեր վստահելի աղբյուրը

«Քաղաքում տեղի ունեցողն արդեն պատահականություն չէ,  «օրինաչափություն» է»,-այսօր լրագրողների հետ հանդիպմանը նման կարծիք հայտնեց բնապահպան Կարինե Դանիելյանը՝ անդրադառնալով հանրային օգտագործման տարածքներում չթույլատրված շինարարություններին:

Նրա խոսքով՝ Երևանն այսօր վտանգված է և փրկության կարիք ունի. «Ստացվել է այնպես, որ քաղաքաշինությունը Երևանում որոշում են միայն փողատեր մարդիկ, որտեղ, ինչ կուզենան կկառուցեն: Անկախությունից հետո, ոչ միայն Երևանում, այլև ողջ Հայաստանում բացարձակ հակաէկոլոգիական, հակասեյսմիկ քաղաքաշինություն է իրականացվել,  սրան հավելվել է նաև պատմաշակութային ժառանգության կորուստը: Հյուսիսային պողոտան կարող է օրինակ ծառայել, թե ինչպես չի կարելի կառուցել»:

Բնապահպանն ընդգծեց՝ մի ձեռքով բնապահպանության վերաբերյալ կոնվենցիաներ են ստորագրում, մյուս կողմից ուղղակի քարե անապատ են դարձնում քաղաքը, ու մեծացվում է վտանգներն ու վնասը:

«Հաղթանակի զբոսայգուց մինչև Սարի թաղ ունեցած մեր կանաչ շերտը վաղուց արդեն բաժանված է առանձնատներ կառուցելու համար: Դա էռոզիայի տարածք է, տներ են կառուցում՝ հաշվի չառնելով, որ այդ լանջը կարող է սահել: Պատահական չէր, որ այնտեղ ժամանակին անտառ էր»:

Կարինե Դանիելյանը հիշեցրեց, կենտրոնում կառուցապատումը սահմանափակող և էկոլոգիական խնդիրներին լուծում է տվող օրենքի նախագիծը ի վերջո դա մտավ ԱԺ, բայց այդպես էլ մնաց այնտեղ. «Պետք է պահանջենք, որ  այդ օրենքն ընդունվի ու սկսի աշխատել»:

Ասուլիսին ներկա «Հայաստանի սպառողների ասոցիացիա» ՀԿ նախագահ Արմեն Պողոսյանը հայտնեց, որ ապօրինի շինարարության հանցագործության մասին հայտարարությունով դիմել է թե արտակարգ իրավիճակների նախարարություն, թե ոստիկանություն, թե Երևան քաղաքի հողի վերահսկողության վարչություն, բայց անօգուտ. «Բոլոր ձևերը կիրառել ենք, սակայն արձագանքը զրո է, Երևանի հանրային օգտագործման այգիներում, պուրակներում շարունակում են ապօրինի շինարարություններ կատարել: Այս խնդիրները մի դեպքում կլուծվեն, եթե մեր ահազանգները տեղ հասնեն ու ադեկվատ գործողություններ իրականացվեն»: