Ձեր վստահելի աղբյուրը

« «Իսլամական պետությունը» գերի վերցրած եզդի բնակչությանն այսօր օգտագործում է որպես կենդանի վահան, մահապարտ ահաբեկիչներ՝ նրանց ուղարկելով առաջին գիծ»,-այսօր լրագրողների հետ հանդիպմանն ասաց «Հայաստանի երիտասարդ եզդիների ասոցացիա» ՀԿ նախագահ Սաիդ Ավդալյանը՝ խոսելով եզդիների նկատմամբ ԻՊ գործողություններից:

Նրա խոսքով՝ այս օրերին եզդիական զինված խմբավորումների կողմից նախապատրաստական աշխատանքներ են իրականացվում հարձակվելու  Հյուսիսային Իրաքի Շանգալի հարակից եզդիական գյուղերի վրա և ազատագրելու դրանք. «Իհարկե, այս ռազմական գործողությունների հաջողությունների դեպքում ԻՊ զինյալներն ամբողջությամբ ետ կքաշվեն Սիրիա, սակայն դա ևս վտանգ ունի, քանի որ այնտեղ նրանք կարող են ինքնակազմակերպվել և կրկին հարձակվել Շանգալի վրա»:

Սաիդ Ավդալյանը գտնում է, որ միակ լուծումն այստեղ այն է, որ ազատագրելուց հետո եզդիների համար ինքնավարություն հաստատվի, որի գաղափարն արդեն արծարծվում է մի շարք գերտերությունների կողմից, ինչպիսիք են Գերմանիան և ԱՄՆ-ը.

«Ինքնավարության հարցը դեռևս սաղմնային վիճակում է, այն դեռ պետք է զարգանա, ինչի հետ կապված լուրջ աշխատանքներ պետք է կատարեն նաև աշխարհի եզդիական համայնքները»:

Նա տեղեկացրեց, որ ՄԱԿ-ի վիճակագրության համաձայն՝ ամբողջ աշխարհում կես միլիոնից ավելի եզդիներ դարձել են փախստական, 25-30 հազարը՝ զոհվել է, մինչև 5 հազար եզդի կին էլ գտնվում է ստրկության մեջ:

«Նրանց ճակատարգրերով ներկայումս միայն զբաղվում են անհատական մակարդակով՝ եզդիական համայքների ներկայացուցիչներ: Պետությունների, միջազգային գերտերությունների ու պետությունների մակարդակով ոչ մի քայլ չի իրականացվում»,-ավելացրեց Սաիդ Ավդալյանը: