Ձեր վստահելի աղբյուրը

Հայաստանում համայնքների խոշորացման  գործընացը նախատեսվում է ավարտել 2018-ին:  Panorama.am-ին տարածքային կառավարման և զարգացման նախարարության աշխատակազմի ղեկավար Մասիս Բաղդասարյանը հայտնեց, որ այս պահի դրությամբ Հայաստանում խոշորացվել է 140 համայնք, որի արդյունքում ձևավորվել է 18 համայնք:

Կառավարության ծրագրի համաձայն, 2017-ին նախատեսված է 150 համայնքի խոշորացում` 18 փնջերում: Թե որ համայնքներն են այս տարվա ընթացքում խոշորացվելու, նախարարությունում դեռ չգիտեն: Մինչև հաջորդ տարվա մարտի 31-ը նախարարությունը պետք է ներկայացնի «Վարչատրածքային բաժանման մասին» օրենքում փոփոխություններ և լրացումներ կատարելու վերաբերյալ օրենքի նախագիծը:

Մ. Բաղդասարյանն ասաց, որ ծրագիրը հաստատվելուց հետո կնախաձեռնվի համայնքային փնջերի ընտրության գործընթացը:

«Այս պահի դրությամբ համայնքային փնջերի կազմերը դեռևս սահմանված չեն»,-ասաց նախարարության աշխատակազմի ղեկավարը:

Դրանից ընտրությունից հետո Ընտրական օրենսգրքի պահանջներին համապատասխան համայնքային փնջերում կկազմակերպվեն տեղական ինքնակառավարման մարմինների ընտրություններ:

Հարցին, թե խոշորացված համայնքների փորձն ի՞նչ է ցույց տալիս, դրանք համապատասխանում են կառավարության սպասելիքներին, Մ. Բաղդասարյանն ասաց. «Խոշորացված  համայնքներից եկած արձագանքները դեռևս տարբեր են: Կարծում եմ, օբյեկտիվ կարծիքներ կլինեն խոշորացված համայնքներում նախատեսված ներդրումային ծրագրերն իրականացնելուց ու համայնքապետարանների աշխատակազմերի մասնագիտական ունակությունները բավարար մակարդակով ձևավորելուց ու վերջիններիս գործունեության բնականոն հունի մեջ մտնելուց հետո»: