Ձեր վստահելի աղբյուրը

Մոտակա ամիսներին մենք կունենանք և տրամադրության, և տնտեսական առումով էական դրական տարբերություն: Դրական փոփոխություններին կնպաստեն 2017-ի բյուջեն ու հատկապես կառավարության ծրագիրը: Panorama.am-ի հետ զրույցում նման կարծիք հայտնեց Հայաստանի Գործատուների հանրապետական միության նախագահ Գագիկ Մակարյանը:

«Փոքր մասշտաբի մեջ մեծ էֆեկտ ստանալու ձևն է աշխատելու հիմա»,-ասաց միության նախագահը:

Նախօրեին խորհրդարանում քննարկվող բյուջեի նախագիծը գնահատվեց որպես գոյատևման բյուջե:  Մի քանի անգամ վերլուծելով 2017-ի պետական բյուջեի նախագիծը, Գագիկ Մակարյանը եկել է եզրակացության, որ այդպես չէ:

Նախագծում նախորդ տարվա ցուցանիշները կրկնվում են, սակայն այն գործողությունները պլանը, որ կառավարությունը սկսել է և պետք է շարունակի 2017-ին, միության ղեկավարին հույս են տալիս, որ գործադիր մարմնի աշխատանքի էֆեկտիվությունը կբերի լավ ազդեցության:
«Բյուջեի նպատակը վերջին հաշվով երկրի տնտեսական զարգացումն ու որոշակի բարեփոխումների, ծրագրերի իրականացումն է: Մենք նայում ենք, կարծես թե գումարները նույնն են, մենք ոչինչ էլ չենք ավելացնում: Դրա համար պատգամավորները այն գնահատեցին որպես գոյատևման»,-ասաց Մակարյանը:

Տնտեսագետի խոսքով, կառավարության ծրագրի էֆեկտիվությունը բարձր է, կառավարությունն ամեն օր նոր քայլեր է կատարում: Սրանք  հաշվի առնելով, նա վստահաբար հայտարարեց, որ քիչ գումարներով մեծ էֆեկտիվություն է լինելու:

«Կառավարության ակտիվությունը, առաջադիմական ծրագրերի ու պահանջների դնելը բերելու է այդ էֆեկտիվության, սա ինովատիվ մոդել է»,-ասաց տնտեսագետը:
Միության նախագահի կարծիքով, Հայաստանի մի կեսը միշտ պահում էր մյուս կեսին, համայնքապետարաններն ու քաղաքապետարանները ստանում էին դոտացիաներ, ոչինչ չէին ստեղծում, միայն փողն էին սպառում:

«Հիմա էդ փողի դիմաց հարց է դրվում՝ որո՞նք են ձեր երազանքները, ծրագրերը, ի՞նչ կարող եք անել: Այսինքն, հիմա տեղերում կարող են շունչ քաշել, ակտիվանել: Տնտեսվարողների ակտիվացումն էլ կբերի մաշտաբների մեծացման ու դրական երևույթների»,-ասաց նա:

Նա մասնավորապես դրական է համարում կառավարության երեկվա նիստում  վարչապետի տրված հանձնարարականները, Իրանի հետ համագործակցության ակտիվացմանն ուղղված քայլերը:

«Հայաստանը պետք է ալտերնատիվ ճամփաներ գտնի, չպետք է միայն կախված լինի Ռուսաստանի պոչից, որ Ռուսաստանի նկատմամբ սանկցիաների կիրառումը մեզ մոտ ֆորսմաժորային իրավիճակ ստեղծի: Իրանը կբալանսավորի, քանի որ Ռուսաստանի շուկայի կեսն է»,-ասաց նա:

Հիշեցրեցինք, երբ ռուսական շուկան «ազատագրվեց» թուրքական ապրանքներից, Իրանի նկատմամբ պատժամիջոցները վերացվեցին, տնտեսագետները կանխատեսում էին, որ Հայաստանից այդ շուկաներ արտահանման ծավալների կտրուկ աճ է լինելու: Նման ծավալով ոճ  չեղավ, քանի որ պարզվեց, Հայաստանն այդքան ապրանք չունի:

«Ճիշտ է, մեր ամենամեծ խնդիրները մեծը քանակն է: Դրա համար էլ կառավարության ծրագրով նախատեսվում է, 2018-ից սկսած պտղատու այգիների՝ տարեկան 100 հա հիմնում»,-հարցին արձագանքեց Մակարյանը:

Սա թույլ կտա ուժեղացնել թե թարմ պտուղ-բանջարեղենի բազան, թե պահածոների: Իրանում էլ դրանց պահանջարկն ունեն, հայկական ընկերություններն արդեն ծանոթ են մուսուլմանկան աշխարհում ընդունված «Հալալ» սերտիֆիկատների պահանջներին:

«Դա հնարավորություն կտա իրանական շուկա ավելի հեշտ թափանցել, իրանական շուկան գրավելը նախադրյալ է, որ Բանդար Աբաս նավահանգստով դուրս գալ նաև այլ երկրներ»,-ասաց Մակարյանը, նշելով, որ մեկ տարվա ընթացքում դրական  արդյունքներն արդեն տեսանելի կլինեն: