Ձեր վստահելի աղբյուրը

Ծաղկաձորում կազմակերպված Երիտասարդ բժիշկների ազգային խորհրդի հիմնադիր համագումարի ժամանակ Ամերիաբանկը հանդես եկավ առողջապահական ոլորտի աշխատակիցների համար հատուկ առաջարկով:

Մասնավորապես, բանկն առաջարկում է արտոնյալ պայմաններով և պարզեցված գործընթացով տարատեսակ վարկեր` տրամադրելով մի շարք արտոնություններ առողջապահության ոլորտի թե պետական, թե մասնավոր հատվածի աշխատակիցներին: Նրանք հնարավորություն ունեն ստանալ վարկային գիծ Ամերիաբանկի միջոցով ստացվող զուտ աշխատավարձի  մինչև 6-ապատիկի չափով, առավելագույնը` 5 մլն ՀՀ դրամ: Բանկը տրամադրում է նաև առանց գրավի սպառողական վարկեր` զուտ աշխատավարձի մինչև 10-ապատիկի չափով, առավելագույնը` 5 մլն դրամ:

«Ամերիաբանկի» տարածքային ստորաբաժանումների կառավարման վարչության ղեկավար Անդրանիկ Խաչատրյանը լրագրողների հետ զրույցում նշեց, որ այսօր իրենք ներկայացրեցին առաջարկությունների փաթեթ, որն ուղղված է առողջապահության ոլորտի բոլոր աշխատակիցներին: «Կարծում եմ՝ այդ փաթեթը հետաքրքիր կլինի ոլորտի աշխատողների համար, քանի որ այն ներկայացնում է  մի շարք արտոնություններ  և առավելություններ բժիշկների համար»,- ասաց նա:

Անդրանիկ Խաչատրյանի խոսքերով՝ ամենակարևոր առանձնահատկությունն այն է, որ լինելու են մի շարք արտոնություններ վարկավորման առումով, ինչպես նաև՝ արտոնյալ պայմաններ տարբեր այլ բանկային ծառայությունների մասով: Բացի այդ, առաջարկելու են մի շարք այլ պարզեցված ընթացակարգով վարկավորման պրոդուկտներ: «Ամենակարևորն այն է, որ անկախ տվյալ աշխատակցի այլ բանկում սպասարկվելու հանգամանքից, նա կարող է իր աշխատավարձը տեղափոխել «Ամերիաբանկ» և օգտվել մեր առաջարկած ամբողջական փաթեթից»,- ընդգծեց Անդրանիկ Խաչատրյանը:

Այս արտոնությունների նպատակը, ըստ նրա, այն է, որ առաջարկը փորձում են համապատասխանեցնել բժիշկների կարիքներին՝ տրամադրելով այնպիսի ծառայություններ, որոնցից կարողանալու են օգտվել ստանդարտ ժամերից դուրս, այսինքն՝  ոչ աշխատանքային ժամերին:

Արտոնություններից մեկն էլ այն է, որ հիփոթեքային վարկերի տրամադրման դեպքում 10%-ի չափով ավելացվում է վարկ/գրավ հարաբերակցությունը բանկում գործող ընդունելի ցուցանիշի նկատմամբ: Այլ վարկերի ստացման դեպքում առողջապահության ոլորտի աշխատակիցներին վարկերը տրամադրվում են Ամերիաբանկում գործող տոկոսադրույքից 0,25% ցածր տոկոսադրույքով:

Առողջապահության ոլորտի աշխատակիցներին Ամերիաբանկը տրամադրում է նաև մի շարք այլ արտոնություններ ևս, մասնավորապես՝ անվճար ArCa Classic քարտ,  Visa Electron/Cirrus Maestro քարտ` 1000 դրամով, գործող 2500 ՀՀ դրամի փոխարեն, Visa Classic/Mastercard Standard քարտ` 3000 դրամով, գործող 6000 դրամի փոխարեն, Visa Gold/Mastercard Gold քարտ`10000 դրամով, գործող 20000  դրամի փոխարեն:

Հեռակառավարման համակարգերից օգտվելու համար Ամերիաբանկը տրամադրում է հետևյալ արտոնությունները. Ամերիա Օնլայն բանկինգ և Ամերիա Մոբայլ բանկինգ ծառայությունները տրամադրվում են 1000  դրամ մեկանգամյա վճարով` գործող 6000 դրամի փոխարեն, Ամերիա Հեռախոսային բանկինգ ծառայությունը տրամադրվում է 1000 դրամ մեկանգամյա վճարով` գործող 5000  դրամի փոխարեն: Իսկ մի շարք արտոնություններ ունեցող «Ամերիա Պերսոնա» անհատականացված փաթեթը բանկը տրամադրում է տարեկան ընդամենը 20000 դրամով:

Նշենք, որ Ամերիաբանկը Երիտասարդ բժիշկների ազգային խորհրդի նիստի մասնակիցներին նվիրեց Visa Gold քարտեր ստանալու հավաստագիր` 1 տարվա անվճար սպասարկմամբ: