Ձեր վստահելի աղբյուրը

Հարավային Կորեայում ընդդիմադիր «Արդարություն» կուսակցությունն առաջարկել է երկրի նախագահ Պան Կի Խեին թույլ չտալ երկրից դուրս գալ, ինչպես նաև միջոցներ  ձեռնարկել   նրան դատախազությունում շտապ հարցաքննելու համար:

«ՏԱՍՍ»-ի հաղորդմամբ, կուսակցությունը հայտնել է նախագահին իմպիչմենտ հայտարարելու գործընթաց սկսելու անհրաժեշտության մասին:

Աղբյուրը հիշեցնում է, որ նախօրեին այդ երկրի դատախազությունը հրապարակել է Հարավային Կորեայի նախագահի շուրջ մեծ հնչեղություն ստացած սկանդալի քննության միջանկյալ արդյունքները: Սկանդալի կենտրոնում հայտնվել է Պան Կին Խեի լավագույն ընկերուհին: Նրան ու նախագահի աշխատակազմի նախկին երկու պաշտոնյաների առաջադրվել են մեղադրանքներ կոռուպցիայի, դրամաշորթության ու պաշտոնեական լիազորությունների չարաշահման համար:

Ենթադրվում է, որ նրանք ստիպել են հարավկորեական 50 ընկերությունների տասնյակ միլիոնավոր դոլարներ փոխանցել իրենց կողմից վերահսկվող երկու հիմնադրամներ: Քննության վարկածով, Պան Կին Խեն այդ մասին իմացել է իր ենթականերից ու ընկերուհուց, ավելի շուտ դրան մասնակից է եղել:

Դատախազությունը մտադիր է երկրի նախագահին հարցաքննության կանչել ընթացիկ շաբաթ, սակայն նրա փաստաբանը հայտարարել է, որ երկրի ղեկավարը չի ցանկանում համագործակցել քննություն իրականացնող մարմնի հետ, քանի որ այդ մեղադրանքները վիրավորական է համարում:

Հարավային Կորեայի Սահմանադրությամբ երկրի նախագահի նկատմամբ քրեական գործ հարուցելու իրավունք չկա, բացառությամբ մի դեպքում՝ հայրենիքի դավաճանության: Նախագահի աշխատակազմից Պան Կին Խեի հասցեին հնչած մեղադրանքները որակել են «ստվարթղթե տնակ», որը կառուցված է առանց ապացույցների: