Ձեր վստահելի աղբյուրը

«Հայաստանի նոր վարչապետի կարծիքով հաջորդ տարվա մայիսին կայանալիք խորհրդարանական ընտրություններից առաջ ինքն արդեն ունի ժողովրդի ձայնը ստանալու համար անհրաժեշտ մեսիջը, այն է՝ տնտեսությունը սարսափելի վիճակում է և ինքը այն մարդն է, ով ամեն ինչ կկարգավորի»,-գրում է  Bloomberg գործակալությունը՝ իր լրագրողների՝  Հայաստանի վարչապետ Կարեն Կարապետյանի հետ անցկացրած հարցազրույցի հիման վրա պատրաստված հոդվածում:

 Bloomberg-ին երկրի վարչապետը ասել է, որ երկիրը «լուրջ փոփոխությունների» կարիք ունի ու պնդել է, որ՝  նոր կառավարությունը «առաջարկում է ամենաարագ հնարավոր փոփոխությունները»:

«Մենք կստեղծենք հավասար, մրցակցային միջավայր գործարարության համար», - հարցազրույցում ասել է վարչապետը:

Bloomberg-ը հիշեցնում է, որ հանրապետության նախագահ Սերժ Սարգսյանը նոր վարչապետին անվանել է «փոփոխությունների խորհրդանիշ», իսկ Կարապետյանը իր նշանակման հաջորդող օրերին օրենսդիրներին ասել էր, որ երկրի տնտեսությունը «ծայրահեղ վատ» վիճակում է գտնվում եւ որ անհրաժեշտ են «կառուցվածքային» փոփոխություններ:

«Որևէ մեկը անձեռնմխելի կամ արտոնյալ չէ», - ասել է Կարեն Կարապետյանը, ով, թեպետ կենտրոնացած է արագ փոփոխություններ արձանագրելու վրա, նաև՝ պատրաստվում է երկրի զարգացման ուղիների որոնման նպատակով ձևավորել արտերկրյա մասնագետներից բաղկացած խորհրդատվական խումբ:

Bloomberg-ը գրում է, որ Հայաստանի նոր վարչապետը պատրաստվում է հաջորդ վեց ամիսների ընթացքում մշակել հեռանկարային զարգացման ծրագիր, որպեսզի «2018-ից սկսած երկիրը տարեցտարի կայուն աճ արձանագրի»: