Ձեր վստահելի աղբյուրը

Տնտեսագետ Մեսրոպ Առաքելյանը 2017-ի բյուջեի՝ ներկայացված նախագծում դրայվ չի տեսել:

«Այսպես ասած «անդրայվ» բյուջե է: Նախագիծը որևիցե դրական փոփոխություններ չի նախատեսում: Թվային տեքսով եթե նայենք, եկամուտների աճ գրեթե չի նախատեսվում»,-Panorama.am-ի հետ զրույցում ասաց նա:

Դա տնտեսագետին հիմք է տալիս ենթադրելու, որ ստվերի դեմ պայքարը լուրջ արդյունքներ չի գրանցելու, հակառակ դեպքում հարկային եկամուտների զգալլի աճ կլիներ: Ինչ վերաբերում է ծախսերին, ապա Մ. Առաքելյանի խոսքով, նույն ցուցանիշներն են, ինչ վերջին տարիների:
«Մի փոքր նվազում է նկատվում առողջապահության, կրթության, բնակարանաշինության ոլորտում, այսինքն տնտեսության զարգացման հիմք ապահովող ոլորտներում ունենք այն, ինչ ունեցել ենք վերջին տարիներին, մի բան էլ դեռ պակաս»,-ասաց նա:

Առաքելյանի խոսքով, ավելացել են պետական պարտքի սպասարկման ծախսերը. «Իհարկե ոչ այս կառավարության մեղքով»:

Բյուջեի դեֆիցիտի չափը նա մտահոգիչ է համարում: Հիշեցնենք, որ ֆինանսերի նախարարը հայտարարել էր՝  պակասուրդը  2017- ի համար ՀՆԱ-ի նկատմամբ կլինի 2,8 տոկոս, 2016-ը կավարտենք   5.9 տոկոս ցուցանիշով, նախատեսված 3.5 տոկոսի փոխարեն:
«Կա այն, ինչ կա: Նույն տեմպով շարունակվում է: Նախորդ և ներկա կառավարության այն գաղափարախոսությունը, որ պետք է պետական ծախսերը կրճատվեն, 2017-ի բյուջեում որևէ էական արտահայտում չի գտել»,-ասաց տնտեսագետը:

Նա ուշադրություն հրավիրեց փաստին, որ բյուջեի նախագծով նախատեսվում է ներդրումների ծավալի մի փոքր նվազում:
«Կառավարությունը պետք է իր գործողունեությամբ ստեղծի ներդրումների համար բարենպաստ դաշտ, բայց կանխատեսումները հակառակն են: Դա խոսում է այն մասին, որ կառավարության ցանկությունները, որոնց մասին անընդհատ խոսվում է, էական ազդեցություն չեն ունենալու»,-կարծիք հայտնեց տնտեսագետը:

Բյուջեի թվերը վերլուծելով, Մ. Առաքելյանը եկել է եզրակացության, որ հայ հասարակությունը հաջորդ տարի ավելի լավ չի ապրելու, քան նախորդ տարիներին. «Չկա կենսաթոշակների աճ, աշխատավարձերի բարձրացում: Եթե այս կառավարությունը ի տարբերություն նախորդների, որոշ չափով անկեղծ է արտահայտվում, դա չի նշանակում, որ պետք է կառավարության աշխատանքից գոհ լինել: Եթե հայտարարում են՝ տնտեսության վիճակը վատ է, թոշակները չենք կարող բարձրացնել, դրանից թոշակառուների կյանքը չի բարելավում»:

Խոսելով կենսաթոշակների բարձրացման հնարավորությունների մասին, տնտեսագետն ընդգծեց, այո, ադպիսիք կան՝ ստվերային տնտեսության ու պետական ծախսերի կրճատումները:
«Կառավարությունն իր հաշվարկներով արձանագրում է, որ կա 25-30 տոկոս ստվեր, որոշ հաշվարկներով, նույնիսկ 50-60 տոկոս: Այս թվերից որն էլ հիմք ընդունենք ու համեմատենք, 2017-ին ակնկալվող 3.2 տոկոսանոց տնտեսական աճի հետ, կարող ենք ասել, որ կառավարությունը որևէ էական քայլ չի անում, որ իր կողմից հայտարարված  30 տոկոսանոց ստվերից զգալի կրճատում տեղի ունենա: Եթե եկամուտների մասով նախատեսվում է 0.4 տոկոսի աճ, դա խոսում է  այն մասին, որ կառավարության գործողությունները որևէ ձևով չեն նպաստելու իր կողմից հայտարարծ ստվերի դեմ պայքարին»,-ասաց տնտեսագետը:

Ինչ վերաբերում է պետական ծախսերի կրճատմանը, ապա Առաքելյանը նկատեց, որ հնամաշ ավտոմեքենաներից ազատվելու փոխարեն, պետք են զգալի կրճատումներ: Նա նկատել է, որ պետական աշխատակիցների համար գործում են ծառայողական միկրոավտոբուսներ, բացի այդ, մի քանի տասնյակ փոխնախարարների սպասարկում են ծառայողական մեքենաներ:

«Ընդամենը մի քանի մինի հիմնարկներ փակելով ու դրանց մեքենաները կրճատելով, արդյունքի չենք հասնելու: Անհրաժեշտ են լուրջ ու կտրուկ փոփոխություններ, որի համար պետք է քաղաքական կամք, միևնույն ժամանակ բիզնեսի ու իշխանությունների սերտաճմանը կատարված քայլեր պետք է իրականացվեն»,-ասաց նա: