Ձեր վստահելի աղբյուրը

ՀՀ էներգետիկայի և բնական պաշարների նախարարի տեղակալ Հայկ Հարությունյանն այսօր լրագրողների հետ հանդիպման ժամանակ հայտարարեց, որ արևային էներգիայի զարգացման նպատակով նախատեսում են մշակել ծրագիր, որը կնպաստի փոքր միկրոկայանների մասսայականացմանը:

«Հստակ ծրագիր է պետք, որ գա ժամանակ, երբ ինքնաթիռով Երևան ժամանենք՝ վերևից տեսնենք, որ բոլոր տանիքներին արևային պանելներ են տեղադրված»,- ասաց Հայկ Հարությունյանը:

Փոխնախարարի խոսքերով՝ այս ծրագիրն իրականացնելու համար պետք է համակողմանի միջոցառումներ բանկային սեկտորի հետ, իրավական դաշտում, նորմատիվ դաշտում, լայն իրազեկման գործողություններ, որպեսզի բոլորը հասկանան, թե ինչ օգուտներ կան այս ծրագրից, որ արդեն իմաստ չունի արևային պանելներ չդնելը: «Կարծում եմ՝ կարճ ժամանակում կկարողանանք արդյունքի հասնել, քանի որ ախտորոշել ենք բոլոր խնդիրները, գիտենք՝ կոնկրետ ինչ պետք  է անենք, ու հիմա ամենօրյա աշխատանք է տարվում բոլոր շահագրգիռ կողմերի հետ, որպեսզի այս ծրագիրը մշակվի և իրականացվի»,- ընդգծեց Հայկ Հարությունյանը:

Հաջորդ քայլը, ըստ նրա, համակարգային արևային կայանների կառուցումն է: Նա հայտնեց, որ երկու շաբաթ առաջ Էներգետիկայի նախարարությունն առաջարկել է  Հանրային ծառայությունները կարգավորող հանձնաժողովին (ՀԾԿՀ) սակագին սահմանել մինչև մինչև 1 ՄգՎտ հզորությամբ արևային ֆոտովոլտային կայանների համար: Այդ սակագինը հավասար պետք է լինի քամու էներգետիկայի համար սահմանված սակագնին:

Հայկ Հարությունյանի խոսքերով՝  արդեն բոլորը կարող են դիմել ՀԾԿՀ-ին, ստանալ սակագին ու կառուցել արևային կայան, իսկ պետությունը, ըստ նրա, «Էներգետիկայի մասին» օրենքով 20 տարի պարտավոր կլինի այդ էներգիան գնել: 

«ՀԾԿՀ-ն շուտով կհրապարակվի որոշումը, որով կֆիքսվի այդ սակագինը»,- ասաց փոխնախարարը:

էներգետիկայի և բնական պաշարների նախարարի տեղակալը նաև հայտնեց, որ   նախատեսում են մրցույթ հայտարարել 50 ՄգՎտ հզորությամբ արևային կայան կառուցելու համար:

«Մրցույթը կլինի նույնպես սակագնի համար և ակնկալում ենք բավականին ցածր սակագին: Շատերը պնդում են, որ արևային էներգետիկան թանկ է, պետք չէ դա օգտագործել, մենք այս ծրագրով փորձում ենք ապացուցել, որ դա այդպես չէ, և ակնկալվող սակագինը լինելու է բավականին ցածր»,- ընդգծեց նա՝ հավելելով, որ նպատակը Հայաստանի համար էներգետիկ անկախության ապահովումն ու ամպրապնդումն է:

Հայկ Հարությունյանն արևային կայանների արդյունավետությունն իր օրինակով  ներկայացրեց՝  նշելով, որ իր տանն արդեն տեղադրել է արևային կայան և  արդեն 2.5 ամիս է իր սպառած էլեկտրաէներգիան ինքն է արտադրում։ 

«Ես իմ տան տանիքին տեղադրել եմ արևային պանել, և արդեն 2.5 ամիս է՝ իմ կողմից սպառած էլեկտրաէներգիան ինքս արտադրում եմ: Հորդորում եմ բոլորիդ՝ նույնը անել: Դիմել եմ  լիզինգի, լիզինգով տեղադրել են, նախնական ներդրում չի պահանջում և այն գումարը, որ ես պետք է ամսական վճարեի հոսանքի համար, պարզապես վճարում եմ լիզինգի համար»,- ասաց Հայկ Հարությունյանը:  

Նրա խոսքերով՝ մեկ բնակարանի համար միջին սպառումը  կազմում է 200-250 կիլովատ/ժամ, իսկ տարեկան ցուցանիշը հասնում է 2400 կիլովատ /ժամի։ 2400 կՎտ/ժամ ապահովելու համար անհրաժեշտ է 1.5 կՎտ/ժամ հզորության արևային պանել, այսինքն՝ 5 պանել: Մեկ կիլովատտ պանելի արժեքը, ըստ նրա, տատանվում է՝ միջինը 1000 դոլար:

Այսպիսով, ըստ Հայկ Հարությունյանի, վճարում ես 1500 դոլար և ունենում ես անվճար էլեկտրաէներգիա 25-30 տարվա համար: