Ձեր վստահելի աղբյուրը

Ծանրամարտի Հայաստանի հավաքականի գլխավոր մարզիչ Փաշիկ Ալավերդյանը համաձայն է Համաշխարհային հակադոպինգային գործակալության հրապարակած դոպինգ նմուշների վերանայված արդյունքների հետ և մարզաձևի մեր ֆեդերացիան չի առարկի միջազգային ֆեդերացիայի հետագա որոշումը՝ Հռիփսիմե Խուրշուդյանի որակազրկման վերաբերյալ: Այս մասին Ալավերդյանն ասաց լրագրողների հետ այսօր կայացած զրույցում՝ մանրամասնելով իրավիճակը:

«Առաջին պարզաբանումը եղել է հունիսին: Առաջարկ ենք ստացել բացել 2-րդ սրվակը: Եվ քանի որ չունենք համապատասխան մասնագետ, ով կգնար ու կմասնակցեր այդ գործընթացին, համաձայնել ենք նրանց որոշման հետ: ՄՕԿ-ն իրավունք չունի որակազրկել մարզիկին, նա միայն կարող է հետ պահանջել մեդալը: Որակազրկման հետ կապված որոշում կայացնում է միջազգային ֆեդերացիան, իսկ Մալազիայում տեղի ունեցած ֆեդերացիայի նիստի ժամանակ նման որոշում չի կայացվել»,- ասաց Ալավերդյանը:

Հայաստանի հավաքականի գլխավոր մարզիչը հայտնեց, որ իրենք նույնիսկ նամակով պատասխանել են և գրել, որ համաձայն են նրանց կարծիքի հետ և կընդունեն ցանկացած որոշում: Փաշիկ Ալավերդյանը չի ժխտում, որ մեր մարզուհին բոլորի նման օգտագործել է դեղամիջոց, որը բարձրացնում է տեստեստերոնի քանակն ու աշխատունակությունը: Սակայն դա արվել է զուտ այն պատճառով, որ հավասարը հավասարի հետ մրցի:

«2004 և 2008 թթ. Օլիմպիական խաղերին մասնակցած մարզիկների 90 տոկոսն օգտագործել է արգելված խթանիչներ: Պարզապես ժամանակին դա արգելված չէր: Դեղամիջոցն օրգանիզմում շատացնում էր տեստեստերոնի քանակը, որը բարձրացնում էր աշխատունակությունը: Մրցումներից 100 օր առաջ պետք է դադարեցնես դրա օգտագործումը և լինես մաքուր: 4 տարի առաջ ՄՕԿ-ի նախագահ դարձավ Թոմաս Բախը, ով բժիշկ է, և ասաց, որ կարող է ուսումնասիրել ավելի վաղ հանձնած անալիզների նմուշները, օրինակ՝ 400 օր առաջ: Այսինքն՝ առաջին մուտք գործած անալիզները: Այստեղից էլ սկսվեց այս քաոսը: Ինչ արած՝ ուժի դեմ ոչ մի պատասխանատվություն չկա: Մեխի և մուրճի դեմ ոչինչ անել չես կարող»,- ասաց նա:

Ֆեդերացիայի գլխավոր քարտուղարը շեշտեց, որ մեդալը կվերադարձնեն այն ժամանակ, երբ հստակ ամսաթիվ կսահմանվի, իսկ մինչ այդ ոչինչ անել չեն պատրաստվում: Հռիփսիմեն կշարունակի մարզվել իր սովորական հունով, նույնը կանի նաև Տիգրան Մարտիրոսյանը:

«Օլիմպիական խաղերից հետո Հռիփսիմե Խուրշուդյանը 4 տարի շարունակ մասնակցել է տարբեր մրցաշարերի: Իրականում՝ որակազրկված մարդուն թույլ չեն տալիս մրցելույթներ ունենալ: Ի դեպ՝ Հռիփսիմեն Հայաստանում ամենաշատ դոպինգ-անալիզներ հանձնած մարզուհին է: Պարզապես լինում են պահեր, երբ պատերազմում հաղթելու համար ստիպված ես կռվել իրենց զենքով»,- ասաց Ալավերդյանը:

Նա ավելացրեց, որ Ռուսաստանի ծանրամարտի հավաքականի օրինակով Հայաստանին թիմային որակազրկում չի կարող սպառնալ, քանի որ Ռուսաստանի ընտրանու ծանրորդներն արգելված խթանիչներ էին օգտագործել նախաօլիմպիական տարում՝ 2015 թ., իսկ հայ ծանրորդները 2013 թ. սկսած անգամ զգուշացումներ չունեն: