Ձեր վստահելի աղբյուրը

«Մեկնընդմիշտ ֆիքսեք՝ ՀՀ պետական լեզուն հայերենն է, մեր լեզուն մեր անկախության հիմնարար արժեքներից մեկն է, և «Լեզվի մասին» օրենքը փոփոխման ենթակա չէ»,- այս մասին այսօր կառավարության նիստից հետո լրագրողների հետ զրույցում ասաց ՀՀ կրթության և գիտության նախարար Լևոն Մկրտչյանը՝ անդրադառնալով այն հայտարարությանը, թե ԽՍՀՄ  երկրներում ռուսերենին օրենսդրական հատուկ կարգավիճակ տալու ուղղությամբ աշխատանքներ պետք է տարվեն:

Ինչ վերաբերում է օտար լեզուների զարգացմանը, ապա, ըստ նախարարի,  եթե ուզում ենք ունենալ գիտակրթական պոտենցիալ, ապա ՀՀ քաղաքացիները պետք է մայրենի լեզվին փայլուն տիրապետումից զատ, ունենան օտար լեզուների իմացություն: «Եվրոպական երկրներում ռեալ երեք լեզվի գործածություն է, բացի սեփական լեզվից: Մենք դնում ենք առնվազն երկու օտար լեզվի խորացված, ամբողջական կիրառման հարցը»,- նշեց Լևոն Մկրտչյանը: 

Ըստ ԿԳ նախարարի՝ պետք է տարանջատել լեզվի պետականացման և լեզվի զարգացման հայեցակարգերը. «Այս երկու հարցը իրարից տարանջատեք և ՀՀ-ում նման հարց մի բարձրացրեք»: 

Նա նաև նշեց, որ Հայաստանից դուրս գտնվող որևէ պաշտոնատար անձ կարող է կարծիք հայտնել, բայց մենք ունենք օրենսդրություն, որը փոփոխելու որևէ հիմք չկա: «Որևէ օտար լեզվին կարգավիճակ տալու խնդիր բացարձակ չկա, կա օտար լեզուների ուսումնասիրությունը խորացնելու հարց, բայց դա կարգավիճակի հետ որևէ խնդիր չունի»,- ասաց նախարարը:

Լևոն Մկրտչյանի խոսքերով՝ Հայաստանում պետք է լինեն լեզուների զարգացման հայեցակարգեր, ընդ որում՝ ռուսերենի զարգացման հայեցակարգն ընդունվել է 1998-ին: Ըստ նրա՝ ռուսաց լեզվի պարագայում ունենք ևս մի կարևոր դաշտ,  գտնվում ենք Եվրասիական տնտեսական միության գործակցության դաշտում, և ռուսերենը եվրասիական տարածաշրջանում միջպետական հաղորդակցման լեզու է: Բացի այդ, մենք գտնվում ենք ռազմատեխնիկական համագործակցության դաշտում և  ռուսերենն անհրաժեշտ է, բայց կարգավիճակային խնդիր չի կարող լինել:

Նախարարը նշեց, որ չպետք է մոռանանք` Հայաստանը անկախ, ինքնիշխան  երկիր է, չպետք է մենք մեզանից վախենանք և պետք է մեր ուժերին վստահենք: Ըստ նրա՝ ռուսերենը առավել տարածված օտար լեզու է Հայաստանում և շահագրգռված են, որ այդ լեզուն ամրապնդվի, զարգանա,  նաև շահագրգռված են, որ  անգլերենն ամրապնդվի:

Լևոն Մկրտչյանի խոսքերով՝ ինքը մտահոգություն ունի, որ Հայաստանում սկսում են կորցնել գերմաներեն լեզվի մշակույթը, ֆրանսերենը:

ԿԳ նախարարը նաև ասաց, որ ՀՀ-ն ունի հստակ օրենսդրություն, օրինակ՝  եթե Վրաստանում կարող են բարձրագույն կրթություն ստանալ ոչ իրենց մայրենի լեզվով, այլ  անգլերենով, ապա Հայաստանում այդ իրավունքը չկա:

«Հայաստանի քաղաքացիները կրթություն ստանում են հայերեն լեզվով: Դպրոցներում, մենք բոլոր մայր առարկայախմբերը՝ բնագիտությունն ու հումանիտարը, անցնում ենք մայրենի լեզվով: Լեզվական մյուս առարկայախումբը գալիս է ավելացնելու և չի ընդգրկում մայր առարկայախմբերին: Սա արդեն երախշիք է: Եթե մենք ուզում ենք մեզ վախեցած զգանք, եկեք զգանք: Գիտե՞ք, մենք այդ վախն ունենք, քանի որ Խորհրդային միության մի հանրապետություն էինք, որտեղ պայքարում էինք մեր ինքնությունը, մեր լեզուն պահպանելու համար: Այսօր մենք անկախ ու սուվերեն երկիր ենք: Բայց մենք ռազմատեխնիկական համագործակցություն ունենք, մեր սպաներն ու զինվորները պետք է կարողանան ինստրուկցիաները ռուսերեն կարդալ»,- ընդգծեց Լևոն Մկրտչյանը: