Ձեր վստահելի աղբյուրը

«Արևիկ» հրատարակչությունը, որն արդեն 30 տարի է միայն մանկական գրականություն է հրատարակում, այս տարվա ընթացքում թողարկել է 23 տեսակ գիրք:  «Արևիկ» հրատարակչության տնօրեն Սաբեթ Հովհաննիսյանը Panorama.am-ի հետ զրույցում ասաց, որ բավական լուրջ ցուցանիշ է:

«Մենք հրատարակել ենք հիմնականում հեքիաթներ, նաև ձայնային այբենարան, նկարելու գրքեր, փազլ գրքեր:  Փորձում ենք տարեցտարի ավելի բազմատեսակ, գունեղ անել,  լսել երեխաներին՝ ինչ է պետք նրանց, փորձում ենք ամենակարևորը՝ ուշադրություն դարձնել տպագիր գրքին: Փորձում ենք երեխաներին տալ այն, ինչը գտնում ենք, որ լավ ասելիք ունի, լավ կլինի, որ այդ բարոյական տեսակետներով մեծանան երեխաները»,- նշեց նա:

Ս. Հովհաննիսյանի խոսքով՝ հիմա Ղազարոս Աղայանի, Հանս Քրիստիան Անդերսենի, Գրիմ եղբայրների, Հովհաննես Թումանյանի հեքիաթները հրատարակում են փոքր ֆորմատով, որպեսզի  մատչելի լինի, և ծնողները գոնե ամսվա մեջ երկու անգամ կարողանան գնել:

«Մեծ ֆորմատի գրքերը հիմնականում գնում են նվիրելու համար»,- հավելեց հրատարակչության տնօրենը:

«Արևիկ» հրատարակչությունը փորձում է նոր հեղինակների գործեր ներկայացնել, որոնք, Ս. Հովհաննիսյանի խոսքով, դժվար են մտնում շուկա, շատ հատարակիչներ խուսափում են նման քայլ անել, նաև գրավաճառներն են մտավախություն ունենում:

Շուտով հրատարակչությունը  կներակայանցի ամերիկյան բանաստեղծ, արձակագիր  Շել Սիլվերսթայնի «Նվիրվող ծառը» ստեղծագործությունը:

«Ողջ աշխարհում բեսթելեր է: Վստահ եմ, որ երեխաները շատ են սիրելու: Թարգմանել ենք հայերեն»,-ընդգծեց նա:

Ս. Հովհաննիսյանի խոսքով՝ տարեցտարի ավելանում են ընթերցողները, ինչը նկատելի է հենց գրքերի վաճառքից:

«Սերտ կապեր ունենք «Բուկինիստ» գրախանութի հետ: Իրենք իմ առջև մի խնդիր են դնում՝ հրատարակեք գրքեր: Սրանից լավ ցուցանիշ չի կարող լինել: Իրենք սպառման խնդիր չունեն»,- ասաց «Արևիկ» հրատարակչությունը տնօրենը:

Նա նաև նշեց, որ թեև ողջ աշխարհում գերիշխում է էլեկտրոնային գրականությունը, Հայաստանում՝ տպագիր գիրքը, հատկապես մանկական գրականությունը. «Սա ուղղակի փայլուն ցուցանիշ է»: