Ձեր վստահելի աղբյուրը

Բյուրոկրատ գրախանութ-սրճարանում  վաղը տեղի կունենա «Բարի տոպրակ» նախագծի առաջին ցուցահանդես-վաճառքը, որտեղ  ներկայացված կլինեն «Բարի տոպրակ» նախագծի մասնակիցների՝ Նոր Խարբերդի մասնագիտացված մանկատան երեխաների կողմից պատկերազարդված էկոտոպրակները: Միջոցառման PR պատասխանատու  Սաթենիկ Խաչատրյանը Panorama.am-ի հետ զրույցում ասաց, որ «Բարի տոպրակ» նախագիծը ստեղծվել է 2016 թվականին՝ Հայ օգնության ֆոնդի,  «Ջի Տեքս» արտադրամասի և Նոր Խարբերդի մասնագիտացված մանկատան նախաձեռնությամբ:

«Համագործակցության նպատակն է ապահովել սահմանափակ կարողություններով երեխաների զբաղվածությունը, տալ նրանց ինքնադրսևորման հնարավորություն: Մենք որոշեցինք այս միջոցառումն անել Հաշմանդամների միջազգային օրվան ընդառաջ՝ վեր հանելով նաև  հաշմանդամություն ունեցող անձանց  հասարակության լիարժեք անդամ լինելու  խնդիրը»,- նշեց նա՝ հավելելով, որ միջոցառման ընթացքում  իրենց աշխատանքներն անձամբ կներկայացնեն նախագծի շահառու երեխաները:

Սաթենիկ Խաչատրյանն ասաց, որ  մանկատան 25 սան մեկ ամսում նկարել են 80 պայուսակի վրա, որոնք էլ ներկայացվելու են ցուցահանդես-վաճառում:

«Երեխաները մանկատանն անցնում են նկարչության, ձեռքի աշխատանքի, կավագործության դասընթացներ»,- հավելեց նա:

Ցուցահանդես- վաճառքից ստացված հասույթն ուղղվելու է Նոր Խարբերդի մասնագիտացված մանկատանը:

Ս. Խաչատրյանն ասաց, որ այս նախագիծն առաջին համագործակցությունն է և արդյունքը կողմերին բավարարելու դեպքում նմանատիպ նախագծերը կլինեն շարունակական:

Նոր Խարբերդի մասնագիտացված մանկատունը գործում է 1950 թվականից:  Մանկատունը նախատեսված է մինչև 18 տարեկան մտավոր և ֆիզիկական լուրջ խնդիրներ ունեցող երեխաների համար:  Այժմ մանկատան խնամքի ներքո են գտնվում շուրջ 240 երեխա:

Լուսանկարները տրամադրել է Ս.Խաչատրյանը: