Ձեր վստահելի աղբյուրը

Հայաստանի Հանրապետական կուսակցության 16-րդ համագումարում ընդունվեց համագումարի բանաձևը, որը ներկայացրեց  ՀՀԿ փոխնախագահ Արմեն Աշոտյանը.

«Հայաստանի Հանրապետական կուսակցության շարունակում է  հետևողական աշխատանքով քայլ առ քայլ ամրապնդել կուսակցական բարդ և բազմաշերտ  համակարգը: Շարունակական ջանքեր են ներդվում կուսակցական  մեխանիզմի արդյունավետության բարձրացման, արդիականացման ուղղությամբ: Ավելացել է կուսակցության  սկզբնական կամակերպությունների քանակը, ընդարձակվել է ՀՀԿ կապերն  արտաքին աշխարհում, աշխատանքներ են իրականացվում կուսակցականների  քաղաքական և գաղափարական մակարդակը բարձրացնելու ուղղությամբ, հիմնադրվել է և իր գործունեությունն է սկսել Անդրանիկ Մարգարյանի անունը կրող Հայաստանում առաջին կուսակցական, քաղաքական դպրոցը:

2016-2018 թվականները լինելու են խիստ կարևոր Հայաստանի սահմանադրության անցումային դրույթներն արդյունավետորեն կյանքի կոչելու տեսանկյունից: ՀՀԿ-ն  պատրաստ է հստակ առաքելություն ստանձնել այս անցումային շրջանում, որպեսզի այն լինի հնարավորինս կայուն, սահուն, անցնցում:

Մեր բոլորի ուշադրության կենտրոնում է Հայաստանի տնտեսությունը, առկա բոլոր մարտահրավերներին արդյունավետ արձագանքելու և երկարաժամկետ սոցիալ- տնտեսական զարգացում ապահովելու  գերակայությունը:

Մեզ հաջողվել է զարգացնել բոլոր այն ինստիտուտները, որոնք, զսպանակի նման աշխատելով, կարողանում են լրջորեն մեղմել արտաքին աշխարհից եկող ուժեղ բացասական ազդակները, չթողնել, որ դրանք վատթարացնեն մարդկանց և ընտանիքների  կյանքը:

Վերանայելով մեր առաջնահերթությունները, սահմանափակելով ծախսերը, ընդունելով պահպանողական բյուջե՝  կարողացել ենք արդյունավետ դիմագրավել մարտահրավերներին, բարձրացնել տնտեսության մրցունակությունը, մեծացել արտահանումը, հիմք դնել տնտեսական կայուն աճի:

Այս տեսանկյունից գալիք տարիների փոփոխությունները լինելու են բեկումնային:
Հայաստանը միջազգային հարաբերություններում շարունակում է հանդես գալ որպես պատասխանատու, հավասարակշռված, կանխատեսելի և վստահելի երկիր: Մեր արտաքին քաղաքականության նպատակն ու միջազգային հարաբերություններում մեր ներգրավվածության բանաձևը մեր գործընկերների հետ հարաբերությունների զարգացումն ու խորացումն է, աշխարհում Հայաստանի բարեկամների թվի ավելացումը:

Արցախի հարցը կարող է լուծվել միայն խաղաղ բանակցությունների ճանապարհով:  Մեր դիրքորոշումն անփոփոխ է.  Լեռնային Ղարաբաղի հիմնախնդիրը պետք է լուծվի միայն Արցախի ժողովորդի ազատ ինքնորոշմամբ:

Այսօր Հայաստանի զինված ուժերի ռազմատեխնիկական, տեխնոլոգիական և կադրային արդիականացման միջոցով մենք ձևավորում ենք ժամանակակից բանակ: Վերջին շրջանում արդեն իսկ լրջորեն փոխվել է մեր բանակի դիմագիծն և զինանոցը: Վստահ եղեք, որ մեր բանակի արդիականացման համար մենք ոչինչ չենք խնայելու:

Առկա մարտահրավերները  պահանջում են խնդիրների լուծման նոր մոտեցումներ նաև Հայաստան-սփյուռք հարաբերություններում: Մեր համընդհանուր նպատակադրումը հստակ է՝ Հայաստանի երկարաժամկետ սոցիալ-տնտեսական զարգացում և առաջ գնացող Հայաստանի շուրջ համայն հայության միավորում:

Հանրապետականը համագործակցության համար բաց է բոլոր շահագրգիռ և հայրենասեր ուժերի, անհատների համար, մենք պատրաստ է աշխատել յուրաքանչյուրի հետ, ով ցանկանում է քարը դնել քարի վրա` մեր ընդհանուր տունը շենացնելու համար:

Համախմբելով մեր ժողովրդի մարդկային ներուժը և ինտելեկտուալ կարողությունները՝ մենք միասին ենք հաղթահարելու առկա դժվարությունները, որպեսզի հաղթեն հայն ու Հայաստանը: Հայաստանը հաղթելու է»: