Ձեր վստահելի աղբյուրը

Նոր Սահմանադրությամբ էապես բարձրանում է կուսակցությունների դերը մեր հասարակական-քաղաքական կյանքում և այսուհետ ինքնաբերաբար անհետանալու են մարդ-կուսակցությունները կամ ակումբ-կուսակցությունները: Այս մասին ՀՀԿ 16-րդ հերթական համագումարի ընթացքում իր ելույթում հայտարարեց ՀՀ նախագահ, ՀՀԿ կուսակցության առաջնորդ Սերժ Սարգսյանը:

«Քաղաքական կուսակցությունների հիմանական ձևավորող և շարժիչ ուժը պետք է լինեն գաղափարակից համախոհները: Այս նոր պայմաններում քաղաքական դաշտի բյուրեղացումը անխուսափելի է: Դա առաջին հերթին արտահայտվելու է կառավարող և ընդդիմադիր բևեռների ավելի հստակ տարանջատմամբ: Նաև անխուսափելի է դառնում քաղաքական միավորների խոշորացումը», - ընդգծեց Սերժ Սարգսյանը:

Նախագահի խոսքով` Հանրապետականը հատուկ առաքելություն պետք է ստանձնի անցումային շրջանում:

«2016-2018թթ-ի փուլը պետք է լինի հնարավորինս կայուն, սահուն և անցնցում: Մենք` որպես համախոհների թիմ, այդ ընթացքում պետք է հանդես գանք որպես առաջնորդող և սկզբունքային, բայց միևնույն ժամանակ` բանակցող, միջնորդող, հակասությունները հարթող ուժ», - ասաց նախագահը: