Ձեր վստահելի աղբյուրը

Երևանում անօթևան  տղամարդու մահվան դեպքի առթիվ նշանակվել է դատաբժշկական փորձաքննություն, նրա ինքնությունը պարզված է: Panorama.am-ին հայտնեցին Քննչական կոմիտեից:  Շրջանառվող լուրերի համաձայն, 38- ամյա տղամարդ ապրել է փողոցում, հաճախ օգտագործել է ալկոհոլ:

Առջևում ձմեռ է, ցուրտն ավելի խստաշունչ է դառնալու: Հանրապետությունում ապրող անօթևաններին հայտնաբերելու, նրանց տանիքի տակ տեղափոխելու համար  «Հանս Քրիստիան Կոֆոեդ» հայ-դանիական բարեգործական հիմնադրամի աշխատակիցները շաբաթը 2-3 անգամ երեկոյան ժամերին փողոցներում շրջայցեր են իրականացնում:

Հիմնադրամի  տնօրեն Շավարշ Խաչատրյանը Panorama.am-ի հետ զրույցում հայտնեց, որ իրենք հաշվառել են մարզերում ու Երևանում ապրող 880 անօթևան: Նրանցից 300-ն ունեն այնպիսի հիվանդություններ, որոնց առկայության դեպքում արգելվում է անօթևանների կացարան տեղափոխել:

««Սոցիալական աջակցության մասին» օրենքով անօթևանների կենտրոն մենք իրավունք ունենք ընդունել այն քաղաքացիներին, որոնք անօթևան են ու միաժամանակ չեն տառապում հոգեկան հիվանդություններով, թոքախտով, հեպատիտ Ց-ով, մաշկային հիվանդություններով: Այս հարցը բաց է մնացել: Մենք փողոցում հայտնաբերում ենք հոգեկան խնդիրներ ունեցող մարդ, հոգեբուժարանը նրան պահում է 21-22 օր, հետո նորից նրանք փողոցում են հայտնվում»,-ասաց հիմնադրամի տնօրենը:

Նա նշեց, որ անցնող տարվա հուլիսի 1-ին նախատեսվում էր  բաշխիչ կենտրոնի բացումը, որտեղ լինելու էին հոգեբույժներ, նեղ մասնագետներ, կենտրոնում ապրելու էին անօթևան ու այդ հիվանդություններով տառապող մարդիկ:

«20 մահճակալով կենտրոն էր լինելու, փակ զոնա: Ասացին՝ բյուջեում փող չկա, հետաձգվում է մինչև 2017-ի հունվարի մեկը: Ես այս պահին չգիտեմ, կլինի՞ կենտրոնի բացումը, թե՞ ոչ»,-ասաց նա:

Հիմնադրամի կացարանում 100 անօթևան պահելու հնարավորություն ունեն: Այս պահին 98 մարդ կա` 39 կին և  59 տղամարդ: Ամռան ամիսներին նրանց թիվը նվազում է 10-15-ով: Հաշմանամություն ունեցողները հետագայում տեղափոխվում են խնամքի կենտրոններ, իսկ եթե պարզվում է՝ հոգեկան խնդիրներ ունեն, նրանք ուղեգրվում են հոգեբուժական կենտրոններ:  2011 թ. դեկտեմբերի 23-ից մինչև առ այսօր հիմադրամի շահառուներն են հանդիսացել 749 անօթևաններ:

Շավարշ Խաչատրյանն ասում է, կացարանում ապրողների մեծ մասը ընտանիքներ, երեխաներ ունեն: Ընտանեկան խնդիրների, իրենց հակումների, սխալների հետևանքով մի պահի անօթևան են դարձել:

«Մեր հիմնական խնդիրն առաջին հերթին այդ մարդկանց իրենց ընտանիքների հետ հաշտեցնելն է:  Օրինակ մի կին կա՝ 58 տարեկան:  Վիճակը շատ ծանր է, քաղցկեղով է  տառապում, մահամերձ է: Երկու տարբեր ամուսիններից 2 աղջիկ, մեկ տղա ունի: Հարազատներին կանչեցինք մեզ մոտ, մտածեցինք՝ հնարավոր է տանեն, էն էլ հրաժարվեցին»,-ասաց հիմնադրամի տնօրենը: