Ձեր վստահելի աղբյուրը

Մեր իրականության մեջ  ազդեցիկ կոչվող շատ կուսակցություններ կան, որոնք այս խորհրդարանում 1 տարի չկարողացան  պահել իրենց խմբակցության կազմը: Բարի եղեք կուսակցության որակի մասին խոսելիս՝ չպայմանավորել միայն ու միայն քանակով,- Ազգային ժողովի արտահերթ նիստում «Կուսակցությունների մասին» օրենքում փոփոխություններ և լրացումներ անելու մասին նախագծի քննարկմանն ասաց պատգամավոր Խոսրով Հարությունյանը՝ խոսքն ուղղելով ԲՀԿ խմբակցության ղեկավար Նաիրա Զոհրաբյանին: 

Նա նշեց, որ այսօրվա դրությամբ Հայաստանում ազդեցիկ կուսակցություն ասելով հասկանում են մեծ թվով անդամներ ունեցող կուսակցություն՝  առանց հաշվի առնելու, թե այդ կուսակցությունը հանրային կյանքի  կազմակերպման սեփական դոկտրինն ունի՞, ունա՞կ է ներկայանալ  հանրությանը՝ հանրության  հիմնական հատվածի սպասելիքները բավարարելու քաղաքական կարողություններով:

«Իսկ քանի՞ կուսակցությունը կլինի մեզ համար հարմար: Ո՞վ է որոշելու, ո՞րն է չափանիշը: Զեկուցողը՝ արդարադատության նախարար Արփինե Հովհաննսիյանը ճիշտ է ասում, գնահատողը մեկն է՝ ընտրողը»,- ասաց Խ. Հարությունյանը:

Նա նշեց, որ  «Կուսակցությունների մասին» օրենքում փոփոխություններ և լրացումներ անելու նախագծի վերաբերյալ 21 առաջարկ է ներկայացրել, կարծում է՝ առաջինից երկրորդ ընթերցում դեռ կքննարկեն այդ առաջարկությունները:

Արփինե Հովհաննսյանն ասաց, որ 21 առաջարկի մի զգալի հատված իրացվելու է առաջինից երկրորդ ընթերցման ռեժիմում: Նա նաև նշեց, որ միջազգային փորձագետների, ՀԿ-ների, այլ խորհրդարանականների  առաջարկների հիման վրա նախագիծը լրամշակվելու է:

Պատգամավորի հարցերն ու նախարարի պատասխաններն ամբողջությամբ՝ տեսանյութում:

 ԱԺ փոխնախագահ Էդուարդ Շարմազանովն իր ելույթում ասաց, որ սահմանադրական բարեփոխումներից հետո Հայաստանում կուսակցության դերն ու նշանակությունը խորհրդարանական համակարգում անչափ կարևոր է: Նրա խոսքով՝  այս ոլորտում կան բազմաթիվ ու բազմազան խնդիրներ, որոնք պետք է շտկվեն:

Նա նշեց, որ կուսակցությունների հնարավոր արագ կայացման համար անհրաժեշտ է ստեղծել հավասար հնարավորություններ, պայմաններ, պետք է ստեղծել ազատ մրցակցություն բոլոր կուսակցությունների համար:  

«Խնդիրների արագ լուծման համար անհրաժեշտ է արագ ընդունել մի օրենք, որը կբացառի արհեստական բյուրոկրատական գործելաոճը և քաշքուկը: Պետք է կարողանանք հնարավորինս գնալ ազատականացման ճանապարհով»,- նշեց Էդ. Շարմազանովը՝  ընդգծելով, որ  կողմ է ազատականացմանը, սակայն դա պետք է լինի աստիճաաբար:

«Ո՞րն է այն կուսակցության իմաստը, որ երկու, երեք կամ չորս, քննարկման հարց է,  գումարման Ազգային ժողովներին չեն մասնակցում, միայն թղթի վրա են գրված, կամ 15 տարի չեն մասնակցում ՏԻՄ ընտրություններին»,-  ասաց ԱԺ փոխնախագահը:

 Էդ. Շարմազանովի կարծիքով, աստիճանաբար գնալու են կուսակցությունների խոշորացման ճանապարհով: