Ձեր վստահելի աղբյուրը

Այսօր ապրիլյան քառօրյա պատերազմում զոհված կրտսեր սերժանտ Հենրիկ Ղահրամանյանի ծննդյան օրն է: Հենրիկն այսօր կդառնար 20 տարեկան:

Արարատի մարզի Մասիս քաղաքի Վահրամ Բաբայանի անվան թիվ 2 հիմնական դպրոցում, որտեղ սովորել է Արցախում  հերոսաբար զոհված Հենրիկը, ստեղծվել է նրան նվիրված փառքի անկյուն, որտեղ վաղ առավոտից դպրոցի աշակերտները հաջորդաբար պատվո պահակ են կանգնում:

Խելացի, բարի, հոգատար...այսպես են բնութագրում հարազատներն ու ուսուցիչները  Հենրիկ Ղահրամանյանին:

«Անչափ բարի, խելացի, համեստ, պարտաճանաչ, օրինակելի աշակերտ էր: Չկար մեկ մարդ, որ Հենրիկին չսիրեր: Բոլորիս համար մեծ ցավ է մեր Հենրիկի կորուստը»,- Panorama.am-ի թղթակցի հետ զրույցում ասաց թիվ 2 հիմնական դպրոցի տնօրեն Արևիկ Նազարյանը:

Տնօրենի խոսքերով՝  Հենրիկը հանդարտ, մեղմ, խաղաղ բնավորություն  ուներ ու  բոլորը նրան նաև այդ բնավորության համար էին սիրում:

«Ընկերներին միշտ օգնում էր, եթե մեկի վրա ուսուցիչները զայրանում էին, ինքն արագ ընկերոջն օգնության էր հասնում, փորձում էր ամեն ինչ անել, որ ընկերոջ վրա չզայրանային»,- հիշում է Արևիկ Նազարյանը:

Տնօրենի խոսքերով՝ Հենրիկը դպրոցում լավ է սովորել, հիմնական դպրոցն ավարտելուց  հետո ուսումը շարունակել է Մասիսի գյուղատնտեսական քոլեջում, որն ավարտելուց հետո անցել է զինծառայության.

«Որոշել էր բանակից զորացրվելուց հետո բարձրագույն կրթության ստանար: Շատ երազանքներ ուներ մեր բարի Հենրիկը»:

Հենրիկը ծնվել է Ռուսաստանում. 6 տարեկան է եղել, երբ ընտանիքը վերադարձել է Հայաստան։ Ծնողների պատմելով Հենրիկն անհոգ մանկություն է ունեցել: 

Արցախում զոհված Հենրիկ Ղահրամանյանը վերջին անգամ ապրիլի 2-ին էր խոսել հոր հետ։ Պատերազմի լուրն ստանալուց հետո ծնողներին զանգել ասել էր, որ իր համար չանհանգստանան, ամեն ինչ լավ է, դրանից հետո՝ մինչև ապրիլի 7-ը նրանից լուր չի եղել։ Ծնողներին ասել են, որ մարտական գործողությունների ժամանակ Հենրիկն արիաբար մարտնչել է, մինչև զոհվելը  3 վիրավորի է դուրս բերել, սակայն  վիրավոր ընկերներին դուրս բերելիս թշնամին նկատել է նրան ու հակառակորդի կողմից ստացած հրազենային վիրավորումից զոհվել է: 

Նշենք, որ ԼՂՀ նախագահի հրամանագրով Հենրիկ Ղահրամանյանը հետմահու պարգևատրվել է «Մարտական ծառայություն» մեդալով: